Gënjeshtarët e internetit!

Janë të shumtë meshkujt që gënjejnë në “Facebook”, “Twitter”, “My Space” etj., por edhe femrat nuk mbeten pas. Ja gënjeshtrat më të zakonshme. “Më shumë se një herë kam folur me persona të cilët ulnin vitet e moshës dhe vinin në profilet e tyre fotografi të personave të tjerë. Pesëdhjetëvjeçarë që hiqeshin sikur ishin tridhjetë, meshkuj që shtireshin si femra etj.”, shkruan Marisa në një forum. “Një ditë më kërkoi që të takoheshim. Pas shumë lutjesh unë pranova, por thjesht për kuriozitet dhe ç’të shihja. Siç e kisha parashikuar, nuk ishte ai i fotos, madje ishte shumë më i shëmtuar. Si të mos mjaftonte kjo, zotëria na ishte edhe i martuar. Ma tha duke më kërkuar falje dhe ajo që më çuditi më shumë ishte fakti se gjithçka e bënte për t’u argëtuar, sepse e dinte që ishte i shëmtuar dhe me atë fotografi arrinte të bënte për vete shumë femra”, shkruan ajo.

Duke u bazuar te një studim amerikan i publikuar prej pak kohësh në revistën “Scientific American”, më shumë se 90 për qind e njerëzve që regjistrohen në një sit takimesh online gënjejnë kur japin të dhëna rreth profilit të tyre. Femrat rrëzojnë nga pesha 2 deri në 9 kilogramë, ndërsa meshkujt nuk tregojnë asnjëherë të vërtetën se sa para fitojnë, nëse janë shkolluar ose jo dhe me çfarë merren në jetën e përditshme. Qëllimi është pak a shumë i njëjti: të jenë më seksi dhe më tërheqës nga ç’janë në të vërtetë. Ja një listë me gënjeshtrat më të zakonshme që i tregojnë meshkujt dhe femrat njëri-tjetrit në internet:

1) Jam e dobët dhe shumë simpatike

Përkthimi: Kam qenë e dobët dhe shumë bukuroshe, por para 15 vjetësh. Nuk e kam pranuar kurrë idenë që mund të ndryshoj dhe pavarësisht se në sajtet e takimeve online kam lexuar që gjithmonë duhet të tregoj të vërtetën dhe të prezantohem ashtu siç jam, mendova të hiqesha tjetër njeri. Ndoshta, pasi të jemi njohur më mirë dhe të kemi filluar ta vlerësojmë njëri-tjetrin, partnerit as që do t’i kujtohen 10 kilet e mia të tepërta (sigurisht, i kam shtuar pasi kam dalë në fotografi).

2) Jam i gjatë, brun dhe shumë simpatik

Përkthimi: Jam një njeri i zakonshëm, me gjatësi mesatare dhe pamje normale. Asgjë më pak, asgjë më shumë, pra nuk jam ndonjë tip që bie në sy. Ky është përkthimi ekzakt. 52,6 për qind e meshkujve, ka bërë të ditur “Medical News Today”, gënjejnë në internet kur flasin për gjatësitë e tyre, njësoj si 39 për qind e femrave. Kështu, nëse brenda vetes nuk jeni ende të sigurt që personi me të cilin keni komunikuar ka thënë ose jo të vërtetën, ose në krahasim me të tjerët ka gënjyer shumë pak, mund ta quani veten me fat, sepse edhe ajo gënjeshtër “e vogël” do të harrohet pas pak kohësh.

3) Jam 29 vjeç

Përkthimi: Eh sikur! E di që jam shumë i vjetër për sajte të tilla dhe nëse nuk shkruaj që jam më pak se 30 vjeç, atëherë nuk do të nxjerr asgjë në dritë. E kush dëshiron të lidhet me një burrë që i ka kaluar të 40-at? Shpresoj që të arrij të nxjerr ndonjë vajzë në takim, sepse atëherë i gjithë mundi do të më shkonte dëm.

4) Kam shumë prirje, veç të tjerash jam drejtor i përgjithshëm i një faqeje të suksesshme interneti

Përkthimi: Kam hapur një aktivitet online, shes kompjuterë të cilët i rregulloj vetë me paratë që më japin prindërit e mi. Pjesën më të madhe të kohës e kaloj në internet, duke parë faqe të ndryshme pornografike, ose duke imagjinuar një jetë alternative në “Second Life”.

5) Jam e ndjeshme, e zgjuar dhe bëj shumë shaka

Përkthimi: Jam shumë e ndjeshme, madje në një pikë të paimagjinueshme, dhe më pëlqen ideja që të tjerëve mund t’u dukem intelektuale.

6) Gjërat më shkojnë mirë, po fitoj goxha para

Përkthimi: Këtë herë e ndiej që kam zgjedhur numrat e duhur, do të fitoj goxha para.
Alternativa: Shumë shpejt gjërat do të ndryshojnë, kam në kokë një ide gjeniale për të fituar para online me porno.

7) Nuk po të vë në lojë

Përkthimi: Jam shumë ironik, por më pëlqen edhe sarkazma që jeton në shpirtin tim. Jam krenar për veten time.

8) Dua të të njoh, mos presim më që të takohemi

Përkthimi: Edhe syri dëshiron pjesën e tij dhe nëse nuk je siç thua, unë përse duhet të vazhdoj të humbas kohë me ty? Dëshiroj të shoh nëse je po aq e bukur sa në foton e profilit.

9) Sapo kam mbyllur një lidhje që zgjaste prej vitesh dhe tani po kërkoj vetëm të njoh njerëz të rinj

Përkthimi: Sapo i kam dhënë fund një historie që zgjaste prej vitesh. Ndihem i shkatërruar dhe tani dua thjesht të shijoj jetën, pa ndonjë angazhim. Problemi është se nëse shprehem kështu, nuk do të bëj figurë të mirë dhe nuk do të më përgjigjet askush.

10) Mes interesave të mia janë: të shkoj nëpër koncerte, të ha mirë dhe të pi shumë mirë

Përkthimi: Zakonisht me miqtë shkojmë në lokalet ku kërcehet, na pëlqen të japim shfaqe me muzikën tekno. Në darkë nuk më pëlqen të gatuaj ose të dal të ha diçka: nëse jam vetëm, blej diçka të gatshme, ndonjë shishe birrë të ftohtë, televizor dhe pastaj gjumë.