Agjenti rebel, në ekranin shqiptar

Filmi më i përfolur aktualisht “Sherlock Holmes”, me aktorët e famshëm Robert Downey Jr dhe Jud Law, së shpejti shfaqet edhe në ekranin shqiptar.

Një ndër filmat më të mirë, fituesi i shumë çmimeve në kinematografi “Sherlcok Holmes”, i regjisorit anglez Guy Ritchie, pas debutimit nëpër ekranet botërore së shpejti do të shfaqet edhe në kinematë shqiptare duke filluar me atë të Tiranës, me datë 24 shkurt. Nën interpretimin e aktorëve të njohur Robert Downey Jr dhe Jud Law, filmi trajton historinë e agjentit të famshëm Sherlok Holm, por tashmë në një variant të ri.

Në një intervistë për “Le Figaro”, regjisori i talentuar Ritchie është shprehur se i ka mbetur besnik personazhit dhe krijuesit të tij Conan Doyle. Kjo e përditshme franceze e ka cilësuar ish bashkëshortin e Madonës si në pozitën e mbrojtësit gjatë tërë kohës së intervistës, fillimisht me përgjigje të llojit po ose jo. Që nga shfaqja e këtij filmi nëpër kinematë amerikane ai është bërë një hit, duke i bërë ballë, me guxim madje edhe vetë cunamit "Avatar". Por regjisori është shprehur paksa skeptik në lidhje për pritjen që Evropa, i rezervon filmit të tij.

Në pyetjen drejtuar atij se pse kritika angleze është zhgënjyer nga ky film, regjisori Ritchie është shprehur në mënyrë ironike duke theksuar se ai realizon punën, që është në funksion të tij dhe jo të asaj që duan kritikët, edhe pse nuk ka shumë kohë që e bënë një gjë të tillë. “Për një gjë jam më se i sigurt. Filmi po shkon mirë gjithkund, përfshi edhe Britaninë e Madhe. Kam dyshuar që vizioni im për Sherlock Holmes-in nuk do t'ju pëlqente të gjithëve. S'ka rëndësi! Por në thelb, puna ime është e thjeshtë: më besoni dhjetë sterlina dhe kam për t'jua kthyer me interes” është shprehur Guy Ritchie.