Mbyllet muzeu arkeologjik i Apolonisë

Si pasojë e rrëshqitjes së tokës, është mbyllur përkohësisht muzeu më i vjetër arkeologjik në Shqipëri “Apolonia”, i cili ndodhet në qytetin e Fierit.

Muzeu arkeologjik i Apolonisë, që ndodhet në qytetin e Fierit ka mbyllur këto ditë dyert për vizitorët, njoftojnë mediat shqiptare. Shkak për këtë është bërë rrëshqitja e vazhdueshme e tokës, e cila ka vënë në rrezik objektet me vlera të mëdha muzeale.

Edhe pse shenjat për dëmtime të muraturave dhe objekteve muzeale janë shfaqur edhe më parë, reshjet e fundit të cilat kanë qenë me intensitet të lartë dhe me një kohëzgjatje më të madhe, kanë ndikuar për keq. Ato kanë shkaktuar një rrëshqitje masive të tokës, e cila ka theksuar më shumë çarjet dhe ka sjellë edhe më afër rrezikun.

Drejtori i Muzeut të Apolonisë, Marin Haxhimihali ka kërkuar ndihmë nga autoritetet përkatëse për të bërë të mundur ndalimin e rrëshqitjeve të mëdha të tokës, pasi sipas tij është ndërprerë hyrja për vizitorët. Rreziku më i madh është ai i shembjes së portikut ku mbahen statujat antike të qytetit. Reshjet e fundit kanë shkaktuar dhe çarjen në themel të murit rrethues, ndërsa vet portiku ka marrë krisje të mëdha të cilat rrezikojnë shembjen e tij. Vetë drejtori ka deklaruar se i vetmi shpëtim është ndërhyrja e Institutit të Monumenteve, pasi ky portik mund të shembet shumë shpejt. Haxhimihali ka theksuar se, duke parë se situata mund dhe të përkeqësohet si pasojë e vazhdimësisë së rrëshqitjeve të tokës në zonën e Apolonisë, në muze po zbatohet plani i emergjencës, që planifikon evakuimin e sendeve të lëvizshme. Muzeu i Apolonisë është ndër më të vjetrit në vendin tonë, në të cilin ndodhet vepra të vjetra antike më shumë se dy mijë vjeçare.