Në fokus të...fotografëve

Larg vuajtjes dhe dhimbjes, Kosova prezantohet me më shumë gëzime, në punimet e fotografëve Besart Gërguri, Vedat Xhymshiti dhe Agron Berishës.

Ekspozita "Fokus '09", e cila është në edicionin e saj të katërt, ka këtë vit 3 fotografë të mirënjohur nga Kosova, Besart Gërguri, fituesi i edicionit të kaluar, Vedat Xhymshiti dhe Agron Berisha. Sipas organizatorëve, ky konkurs organizohet që të jetë një përballje shkollash dhe eksperiencash, me dëshirën që të provokojë një dialog profesional mbi fotografinë artistike, duke u kthyer në një pikë takimi të përvitshëm ballafaqimi të këtyre vlerave, në një botë, e cila u përket të gjithëve. Konkursi është një mundësi për një shprehje sa më të lirë dhe transparente në botën e fotografisë artistike.

Ajo që të bie në sy është ekspresionizmi në shprehje dhe foto e momentit. Larg vuajtjes dhe dhimbjes, Kosova prezantohet me më shumë gëzime, Shqipëria gjithashtu i ka kaluar ditët e 'fatkeqësive' dhe ka më shumë mendime në imazhe.

Interesante edhe shprehjet në fotografi nga Vedat Xhymshiti-Kosovë, Agron Berisha-Kosovë, ku detaji i paramenduar kthehet në një imazh që përcjell emocion dhe shqetëson me pyetjen mbi njeriun dhe fatin e tij. Ndërsa Vështirë të gjendet stili i Besart Gërgurit, fituesit të vjetshëm, i cili ka ndërruar kryekëput shprehjen e realizimit në kompozimin e sivjetshëm, "Ku është Zoti".

Pjesëmarrësit kanë punuar me aparate dixhitale dhe anëtarët e jurisë e kuratori nuk përjashtojnë mundësinë e ekzistencës së një procesi postproduksion, por gjithmonë sipas tyre, "duke ruajtur sensin e fotografisë".