PS: Protesta deri në largimin e Berishës nëse nuk hapen kutitë

TIRANË- Partia Socialiste i ka bërë sërish apel mazhorancës që të hapë kutitë e votimit të zgjedhjeve të Qershorit, duke shqyrtuar projektligjet e depozituara në Kuvend nga ana e opozitës. Deputeti i "selisë rozë" Blendi Klosi theksoi dje se opozita i ka dhënë një shans shumicës e cila nuk duhet ta çojë dëm, për të zgjidhur krizën politike në vend, ndërsa shtoi se PS-ja është e vendosur për të kryer transparencën e zgjedhjeve parlamentare.


Klosi vuri në dukje se nëse nuk kryhet hetimi i plotë i zgjedhjeve të 28 Qershorit, atëherë Kryeministri Sali Berisha duhet të largohet nga qeveria dhe, sipas tij, populli opozitar do t'u rikthehet protestave për të vendosur në vend të drejtën kushtetuese për të hetuar zgjedhjet."Nëse nuk ka transparencë, Sali Berisha do të largohet.


Nëse nuk i njeh opozitës të drejtën për transparencë, atëherë fjala i kalon popullit opozitar dhe Sali Berisha do të përballet me protesta të pandalshme derisa kjo e drejtë kushtetuese e ligjore e opozitës të vihet në vend. I mbetet Sali Berishës të vendosë, ashtu siç do t'i mbetet Sali Berishës edhe përgjegjësia për thellimin e mëtejshëm të krizës.


Partia Socialiste e bëri edhe njëherë hapin e saj. Tani projektligji është në dorë të mazhorancës",- tha dje Klosi. Ai nënvizoi se Berisha deri më tani e ka refuzuar kërkesën e opozitës për të kontribuar mbi zgjidhjen e situatës politike.


Për këtë arsye, sipas tij, opozita i ka dhënë shanse Kryeministrit Berisha, duke njohur rezultatin e zgjedhjeve dhe duke ndërprerë bojkotin ndaj Parlamentit. "Fatkeqësisht, me gjithë dëshirën e mirë dhe vullnetin për bashkëpunim që tregoi Partia Socialiste kjo përpjekje e sinqertë u prit nga mazhoranca e Sali Berishës me arrogancën dhe papërgjegjshmërinë që e kanë karakterizuar atë ngaherë, duke e refuzuar këtë shans pa treguar as minimumin e korrektesës politike e demokratike.


As minimumin e vullnetit për të kontribuar ndaj zgjidhjes së krizës",- theksoi ai. Klosi shtoi se me hyrjen në Kuvend, opozita i dha fund të gjitha alibive që vinin nga kampi i shumicës, pasi sipas tij Partia Socialiste nuk është e interesuar për pushtetin politik por vetëm për të kryer transparencën e zgjedhjeve të fundit parlamentare.