BE vonon liberalizimin, heqja e vizave në verë, gati e pamundur

BRUKSEL- Shqiptarët duket se nuk do të lëvizin pa viza në verë, sikundër u premtua se do të ndodhte nëse do të plotësoheshin kushtet.


Së paku kështu rezulton nga një letër e hapur e organizatës jofitimprurëse e Inisiativës Europiane për Stabilitet, e cila i kërkon urgjentisht Parlamentit Europian të mos shkelë premtimin e bërë për të liberalizuar vizat me Shqipërinë dhe Bosnje Hercegovinën brenda këtij
viti.


Letra e hapur i është dërguar Komisionit Europian, grupit të punës për liberalizimin e vizave, Parlamentit Europian dhe Sekretariatit të Këshillit Europian të PE.


Sipas letrës, BE akuzohet se po përdor standarde të dyfishta lidhur me liberalizimin e vizave me vendet që ngelën në klasë në fazën e parë ku përfitoi Maqedonia, Mali i Zi dhe Serbia.


Letra e firmosur një ditë më parë sqaron se dhe nëse Shqipëria dhe Bosnje Hercegovina do të plotësojnë standardet, do të ketë vonesa në procedurat e BE-së, e cila kishte saktësuar 10 qershorin si datën kur do të vendosej për vizat në këto dy vende.


Sipas letrës, Parlamentit Europian i duhen të paktën 6-7 javë që të përpilojë rezolutën për liberalizimin e vizave pas rezolutës së KE-së, që do të thotë se rezoluta nuk do të jetë gati të paraqitet në Këshillin e Ministrave të BE-së në një takim që do të mbahet gjatë presidencës spanjolle më 3-4 qershor 2010.


Pas kësaj, takimi i ardhshëm i Këshillit të Ministrave të BE-së është në datat 7- 8 tetor, në kohën e presidencës belge dhe nëse vendimi merret pikërisht në këtë datë do të duhen më pak se 20 ditë që vendimi të hyjë në fuqi pas botimit në fletoren zyrtare.


Organizata që ka shkruar letrën u bën thirrje vendeve të BE-së që të mbahet premtimi dhe situata politike në Shqipëri të mos shihet si ndëshkuese për qytetarët.