Gramsh, gjendet në lumë viktima e tretë e aksidentit të së shtunës

UPDATE - Është gjetur në mesditë viktima e tretë e aksidentit në Gramsh. Sipas burimeve nga Gramshi, viktima është parë në ujërat e lumit, ku dje përfundoi makina me 4 persona. Në vend vazhdon operacioni për gjetjen e trupit të katërt.

Nderkohe, sot në orët e paradites u gjeten trupat e pajetë të dy viktimave te para, te cilat u aksidentuan të shtunën, kur furgoni me të cilin udhëtonin ra në lumin Devoll.

Lajmi konfirmohet nga nënprefekti i qarkut të Elbasanit, Shkëlqim Hoxha. Ai tha se kufomat janë gjetur në lumë rreth 20 km larg vendit të ngjarjes, në afërsi të fshatit Godovjatë. Pritet që pas mbërritjes në morg të bëhet edhe identifiki i tyre.

Ndërkohë, polumbarët e RENEA-s po vazhdojnë kërkimet në gjithë gjatësinë e lumit Devoll nga vendi i ngjarjes e deri në hyrje të qytetit të Gramshit, në kërkim të persononit tjeter që humbi nga ky aksident dhe dyshohen si të mbytur në lumë.

Aksidenti i rëndë automobilistik ka ndodhur mbrëmjen e së shtunës në aksin rrugor Korçë-Gramsh në vendin e quajtur Mollëgrabovë. Furgoni me targë KO 1893 B I drejtuar nga Ilirian Balla, 32 vjeç, ka dalë nga rruga dhe pasi ka rrëshqitur dhjetëra metra në humnerë ka rënë në ujërat e lumtit Devoll. Si pasojë e këtij aksidenti mendohet se kanë humbur jetën shtetasit Ilirian Balla, 38 vjeç, Petrit Ahmeti, 20 vjeç, Behar Senkollari, 18 vjeç dhe Elis Sogani, 32 vjeç, të katër me banim në fshatin Bratilë të komunës Kodovjat të Gramshit.

Furgoni i mallrave udhëtonte nga fshati Bratilë në drejtim të Moglicës së Korcës Aksidenti është konstatuar rastësisht dje rreth orës 09:00 të mëngjesit nga banorë të rastësishëm, të cilët kanë parë furgonin që ndodhej në lumë. Më pas në vendngjarje kanë shkuar forcat e policisë, zjarrfikëset, forcat e RENEA-s dhe një helikopter i Minitrisë së Brendshme. Për gjetjen e trupave janë angazhuar edhe banorë të zones, si dhe forca të ushtrisë. Gjatë gjithë ditës së djeshme kanë vazhduar kërkimet përgjatë lumit Devoll dhe janë ndërprerë vetëm në mbrëmje për shkak të errësirës.

Sipas ekspertëve, shkak i aksidentit mendohet të ketë qenë humbja e kontrolit të automjetit nga drejtuesi i tij për shkak të terrenit të vështirë. Sipas banorëve të zones, të katër të zhdukurit kanë qenë në një lokal deri në orën 5 të pasdites e më pas janë nisur për në drejtim të Korçës. Një litar është gjetur në vendngjarje, ndërkohë që një nga telefonat ka rënë deri në orën 4:00 të mëngjesit. Ende nuk dihet nëse kanë vdekur të katër këta shtetas apo janë larguar në drejtim të paditur, pasi deri më tani nuk ka asnjë gjurmë të tyre me përjashtim të furgonit që është parë në mëngjes në lumë.

Në vendin e ngjarjes kanë mbërritur familjarët dhe shumë banorë të zones, ndër të cilët edhe pronari i mjetit. Fatos Shkira tregon se mjetin ia kishte dhënë njërit prej djemve për të transportuar disa mallra drejt Moglicës në Korçë. Ai thotë se 4 djemtë kanë qëndruar në lokalin e fshatit deri rreth orës 18:00, ku kanë konsumuar dhe alkool, dhe më pas janë nisur nga Bratila drejt Korçës. Më pas ai tregon se furgonin ia ka dhënë një ndihmësit të tij, Ilirian Ballës, i cili do të transportonte për në drejtim të Korçës mallra dhe ushqim për bagëtitë. Fatkeqësia mendohet të ketë ndodhur rreth orës 18:00.