Vendet ku jetohet më mirë dhe më keq!

Në të kundërt të asaj që mendonin shumë njerëz, se më mirë jetohet në vendet skandinave apo për një palë tjetër në Amerikë (e cila për 21 vjet rresht është cilësuar si vendi ku jetohej më mirë), studimi më i ri në këtë kuadër arrin në përfundimin se janë francezët ata që kanë arritur t‘i krijojnë vetes kushtet më të mira të jetesës në nivel global. Sipas revistës amerikane "International Living", specializuar për udhëtimet turistike, është pikërisht Franca ku jetohet më mirë. Ekspertët e revistës amerikane e kanë përkufizuar si vendin në të cilin cilësia e jetës është më e mira krahasuar me të gjitha vendet e tjera të globit, ku një seri shërbimesh si trenat me shpejtësi të lartë, shëndetësia, kultura, turizmi, plazhet e klima janë mjaft më cilësore se mesatarja. Përtej taksave të larta, burokracisë e kostos së lartë të jetesës, Franca duket se arrin të ofrojë kushtet më të mira të jetesës për popullsinë e saj.

Për t‘u shënuar është fakti se jashtë Parisit kostoja e jetesës është mjaft e pranueshme, ndërkohë që shtëpitë e banimit shiten për më pak se 100 mijë dollarë. Gjithashtu Franca mund të krenohet për rrjetin shëndetësor më cilësor dhe funksional në botë, gjithashtu edhe për kulturën e saj legjendare. "Franca gëzon një klimë mjaft të këndshme, natyrë të mrekullueshme dhe sistem shëndetëso për t‘u pasur zili nga të gjithë. Ndërkohë që kryeqyteti i saj, Parisi, pa asnjë dyshim mbetet qyteti më i bukur dhe më romantik në botë, tha Laura Sheridan, një ndër drejtueset e revistës "International Living". "Shtojini të gjitha këtyre edhe një infrastrukturë të cilësisë mjaft të lartë dhe mund ta kuptoni edhe vetë përse Franca është vendi ku mund të jetohet më mirë se kudo tjetër në rruzull".

Kriteret

Revista amerikane "International Living" u përpoq të përcaktonte cilësinë e jetës në 191 vende, duke përdorur për këtë përllogaritje aspekte e kritere të reja: koston e jetesës, kulturën e kohën e lirë, ekonominë, ambientin, lirinë, infrastrukturat, sigurinë e rrezikun dhe në fund klimën. Përtej shërbimeve që përmendëm më sipër, Franca shërben edhe për mënyrën e jetesës së popullatës së saj, ndjenjën e komunitetit, vlerat antike të vendit dhe për rëndësinë që u jep tregjeve rajonale.

Klasifikimi

Ajo që bie në sy është klasifikimi ndër 10 vendet e para të listës të Australisë e Zelandës së Re (ndërkohë që mund të vihet re lehtë se në krye të saj dominojnë vendet evropiane. Për t‘u shënuar është se një vend si Argjentina, e cila deri pak vite më parë përballej me probleme të varfërisë ekstreme, ka arritur të renditet e 10-ta në listë.

1. Franca

Burokracia e lodhshme dhe taksat e larta bëhen të papërfillshme nga cilësia fantastike e jetës dhe sistemi shëndetësor.
Pikët: 80/100
Kostoja e jetesës: 55/100
Ekonomia: 69/100

2. Australia

Ekonomia e Australisë ka arritur të përballojë krizën financiare botërore më mirë se asnjë vend tjetër në botë.
Pikët: 81/100
Kostoja e jetesës: 56/100
Ekonomia: 71/100

3. Zvicër

Zvicerianët ia kanë dalë mbanë sepse kanë bërë gjithçka të punojë sipas mënyrës dhe kohës së duhur.
Pikët: 81/100
Kostoja e jetesës: 41/100
Ekonomia: 79/100

4. Gjermani

Pavarësisht krizës botërore gjermanët ia kanë dalë mbanë shumë mirë. Llogarit këtu dhe 30ditë pushime të paguara në vit.
Pikët: 81/100
Kostoja e jetesës: 54/100
Ekonomia: 71/100

5. Zelanda e Re

Në Zelandë një shtëpi kushton mesatarisht 275 mijë dollarë. Nuk ka ndotje dhe kujdesi shëndetësor është në nivele maksimale.
Pikët: 79/100
Kostoja e jetesës: 62/100
Ekonomia: 65/100

6. Luksemburg

Luksemburgu ka një GDP prej 88 mijë dollarë për frymë dhe është një prej vendeve më të pasura të botës.
Pikët: 78/100
Kostoja e jetesës: 44/100
Ekonomia: 85/100

7. SHBA

Është një ndër vendet më të dobishme në botë. Në asnjë vend tjetër nuk mund të arrish më lehtë atë që do.
Pikët: 78/100
Kostoja e jetesës: 56/100
Ekonomia: 67/100

8. Belgjikë

Brukseli është kryeqyteti më i gjelbër i Evropës. Bashkia sterilizon macet endacake dhe punëson dikë për t’i ushqyer.
Pikët: 78/100
Kostoja e jetesës: 41/100
Ekonomia: 66/100

9. Kanada

Kanadaja ka mbetur e qëndrueshme përgjatë gjithë krizës financiare dhe bankat e saj konsiderohet më zvicerane se ato zviceranet.
Pikët: 77/100
Kostoja e jetesës: 62/100
Ekonomia: 69/100

10. Italia

Dimrat janë të shkurtër dhe të butë në jug të Italisë e sigurisht vendi shquhet për jetën e tij të bukur.
Pikët: 77/100
Kostoja e jetesës: 56/100
Ekonomia: 63/100

Vendet me jetesën më të keqe

1. Somali
2. Jemen
3. Sudan
4. Çad
5. Afganistan
6. Sierra Leone
7. Djibouti
8. Eritrea
9. Guinea
10. Angola