Përmendorja e Ibrahim Rugovës në qendër të Shkupit?

Kush nga shqiptarët do të jetë në sheshin e Shkupit

Tashmë është arritur një marrëveshje midis kryeministrit Nikolla Gruevski, në një takim të fundit me partnerin e tij të koalicionit Ali Ahmeti për të ngritur bustet apo përmendoret e tre apo katër personaliteteve historike shqiptare në sheshin e Shkupit, në kuadër të projektit “Shkupi 2014”, bën të ditur agjencia INA.

Nga ana tjetër kanë filluar propozimet se cilët personalitete kombëtare do të vendosen si pjesë e përbërëse e identitetit dhe kulturës shqiptare.

Në mediat e afërta me Qeverinë, por edhe nga burime qeveritare konfirmohet se ndër propozimet më të përafërta për t`u vendosur janë personalitetet dhe atdhetarët shqiptarë Josip Bageri, Nexhat Agolli, Hasan Prishtina, etj. Mirëpo me propozimet e saj qëndron edhe Shoqata e Historianëve Shqiptarë në Maqedoni. Përfaqësues të kësaj shoqate theksojnë se ata janë më të thirrur për të vlerësuar se cilët personalitete historike ndërlidhen me historikun e shqiptarëve në territorin e Maqedonisë aktuale apo Shkupit. “Ka shumë figura dhe ne kohë më parë në adresë të Ministrisë së Kulturës dhe Parlamentit dorëzuam 100 emra me personalitetet historike shqiptare këtu”, ka theksuar për këtë agjenci lajmesh, kryetari i shoqatës së historianëve, prof.dr. Nebi Dervishi. Ndër figurat që tanimë ka marrë dritën e gjelbër për t`u vendosur është Nexhat Agolli, ministri parë i Maqedonisë pas pavarësimit të saj në vitin 1945, i cili nga SHHSHM konsiderohet si një personalitet dhe atdhetar i shquar i historisë më të re shqiptare.

Nga ana tjetër, edhe Lëvizja “Zgjohu!” kohë më parë dorëzoi pranë komunës Qendër propozimet e saj për ngritjen e busteve dhe përmendoreve për personalitetet historike shqiptare. Ndërsa një nga emrat e lakuar nga kjo lëvizje e rëndësishme shqiptare në Maqedoni është edhe emri i presidentit historik, Ibrahim Rugovës, që propozohet si një nga kandidaturat kryesore për t’u vendosur në sheshin e Shkupit. Ndër të tjera janë edhe emrat e Adem Jasharit, Ismet Jasharit-Kumanova, Isa Boletinit, Hasan Prishtinës dhe emra të tjerë të historisë shqiptare. Gjatë ditëve të ardhshme pritet edhe seanca e bllokuar në këshillin komunal të komunës Qendër, ku në rend dite pritet të jetë propozimi për “Burmali Xhaminë” si dhe propozimi i “Zgjohu!” për personalitetet historike shqiptare.

Derisa po vijon debati lidhur me projektin e famshëm “Shkupi 2014” për vendosjen e përmendoreve, në heshtje po vijon të mbahet marrëveshja se cilat nga personalitetet historike shqiptare do të jenë të vendosura, pasi që kohë më parë rreth kësaj u paralajmërua edhe marrëveshja midis Ahmetit dhe Gruevskit, që qendra e metropolit të ketë frymën multietnike me vendosjen e busteve dhe të komuniteteve tjera etnike.