Miratohet pr/ligji për SHISH, ikën drejtori Shaqiri

Mazhoranca qeverisëse vendos nën kontrollin e saj Shërbimin Informativ Shtetëror. Shumica e djathtë ka miratuar dje pa praninë e opozitës dhe në një seancë të mbyllur për mediat, ndryshimet në ligjin "Për Shërbimin Informativ Shtetëror", duke lënë si pjesë të draftit që do t'i paraqitet tashmë seancës plenare, thuajse pjesën më të madhe të dispozitave që përcaktojnë varësinë dhe kontrollin direkt të aktivitetit të këtij shërbimi nga Kryeministri.


Drafti i integruar edhe me amendamentet e SHISH-it dhe që ka marrë votën e komisionit të ligjeve pavarësisht se ka më shumë nene nga projektligji fillestar i paraqitur nga qeveria, përmban në vetvete thuajse të pandryshuar pikat që përcaktojnë detyrat e këtij shërbimi, ku natyrisht mbeten edhe kompetencat dhe të drejtat që ka kreu i qeverisë, si ndaj drejtorit ashtu edhe ndaj veprimtarisë së tij.

Pavarësisht modifikimeve, që i është bërë draftit fillestar, në projektligj ka mbetur thuajse e pandryshuar varësia që i krijohet këtij shërbimi nga kreu i qeverisë, pa pëlqimin e të cilit SHISH-i nuk mund të ndërmarrë thuajse asnjë hap në realizimin e misionit të vet, që natyrisht është siguria kombëtare. Në nenin 3 të ligjit ekzistues të SHISH-it shtohen një sërë pikash dhe në ndryshim nga drafti fillestar, projektligji i integruar ka pësuar vetëm një spostim të renditjes së detyrave që ka shërbimi inteligjent shqiptar, por që në të vërtetë nuk prekin pikat më të nxehta për të cilat gjatë këtyre ditëve ka pasur një kundërshtim të fortë si nga opozita ashtu edhe nga faktori ndërkombëtar. Kështu sërish në këtë draft përcaktohet se SHISH, në përmbushje të detyrave të tij, me pëlqim të Kryeministrit, bashkëpunon me shërbime të vendeve të tjera dhe mbledh informacion rreth veprimtarisë së tyre, kur kjo është e nevojshme.