Musine Kokalari" për gra të guximshme

Është hera e parë që jepet një çmim në Shqipëri me emrin e një gruaje "Musine Kokalari" quhet çmimi i përvitshëm që dha dje Ambasada e Shteteve të Bashkuara.

Është ambasadori amerikan John L. Withers II që i dorëzoi çmimin dje në rezidencën amerikane, asaj gruaje e cila gjatë një viti "ka dëshmuar guxim" në një mision shoqëror apo një detyrë të përditshme në mjedisin shqiptar. Çmimi me këtë emër është pagëzuar po gjithashtu nga Withers II, i cili prej kohësh ka pohuar se është i mbushur me respekt përballë figurës së Kokalarit për kontributin ajo ka dhënë në fushën e ideve politike dhe për modelin etik që krijoi në një kohë të vështirë për burra dhe njerëz të lirë dhe shumë herë më të vështirë për femrën. Në këtë kuptim ky model e lë të hapur drejt sferave humane vlerësimin për gra të guximshme.

Nëse kërkojmë një motiv për "Musine Kokalari - Woman of Courage Award", ambasadori i Shteteve të Bashkuara, thotë": "Nuk kanë fuqi të mbinatyrshme, por përfaqësojnë atë çka është e shkëlqyer, frymëzojnë të tjerë dhe kanë përkushtim me pasion ndaj sjelljes së ndryshimit brenda komuniteteve ku shërbejnë. Çmimi që jep ambasada e SHBA-ve në Tiranë është në kuadrin që traditës për Muajin e Gruas, siç njihet muaji mars në vendin e origjinës së çmimit në fjalë. Por është hera e parë që ky çmim merr emrin e një gruaje në kulturës vendase. Nga katedra akademike dhe universitare Musine Kokalari (1917-1983) është cilësuar pioniere e lëvizjes së feminizmit në Shqipëri dhe për këtë i referohen aktivitetit të saj si shkrimtare dhe veprimtare politike.