Policia e Ramës kërcënon me jetë aktivistët e Lëvizjes ''Zgjohu''

Kryetari i PS urdhëron bandën e tij të armatosur të ushtrojë dhunë dhe presion ndaj aktivistëve të shoqërisë civile

Policia Bashkiake dhunoi dhe kërcënoi me jetë pa asnjë arsye aktivistët e Lëvizjes "Zgjohu" dhe drejtuesit e Zyrës për Mbrojtjen e Konsumatorëve gjatë një proteste në qendër të kryeqytetit. Ka qenë vetë drejtori i Policisë Bashkiake, Zyhdi Dajti, i cili ka kërcënuar me jetë drejtuesit e Lëvizjes "Zgjohu", të cilët po protestonin në Bulevardin "Dëshmorët e Kombit" në kuadrin e Ditës Ndërkombëtare të Konsumatorëve dhe të të drejtave të tyre. Drejtuesi i Zyrës për Mbrojtjen e Konsumatorëve, njëkohësisht edhe drejtues i Lëvizjes "Zgjohu", Altin Goxhaj deklaroi gjatë një interviste për "RD" se, drejtori i Policisë Bashkiake, Zyhdi Dajti dhe drejtori i Inspektoratit të Ndërtimit kanë kërcënuar me jetë një anëtar të Lëvizjes së tij.

Goxhaj tha se falë ndërhyrjes së Policisë së Shtetit, u bë e mundur që situata të normalizohej, pa u lënduar asnjë nga aktivistët. Kreu i Lëvizjes "Zgjohu" tha se, "po të mos ishte Policia e Shtetit do të shpërthente një dhunë e menjëhershme ndaj aktivistëve tanë, ashtu siç u dhunuam më 3 korrik. Ishte Policia e Shtetit që ndërhyri me vendosmëri, bllokoi ndërhyrjet vandale ndaj tabelave dhe shkatërrimin e tyre nga punonjësit e Bashkisë dhe mbi të gjitha, mbrojti aktivistët e Lëvizjes 'Zgjohu'". Ai theksoi se në orën 11.05, punonjësi i Policisë Bashkiake, Broka dhe drejtori i Policisë Bashkiake, Zyhdi Dajti, dëmtuan tabelat e protestës së planifikuar të zgjaste gjithë ditën në qendër të Tiranës dhe kërcënuan fizikisht drejtuesit e Lëvizjes "Zgjohu" dhe të Zyrës për Mbrojtjen e Konsumatorëve. "Ndërhyrja e paligjshme e Policisë Bashkiake u ndërpre nga ndërhyrja e ligjshme e Policisë së Tiranës që po kujdesej për mbarëvajtjen e aktivitetit", sqaron Goxhaj. Duke komentuar këtë incident, Goxhaj tha se ZMK dhe Lëvizja "Zgjohu" do të bëjnë një kallëzim penal në Prokurorinë e Tiranës ndaj Policisë Bashkiake të kryeqytetit. Goxhaj tha se Zyhdi Dajti ka kërcënuar aktivistin e Lëvizjes "Zgjohu", Zirkon Vishaj, i cili ka mbërritur i pari në momentin që Policia Bashkiake ka rrëzuar tabelat e protestës.

-Zoti Goxhaj, aktivistët e Lëvizjes tuaj u dhunuan dje në mes të kryeqytetit nga Policia Bashkiake e Tiranës. Cili është komenti juaj lidhur me këtë incident?

Në 14 mars, Lëvizja "Zgjohu" dhe drejtuesit e Zyrës për Mbrojtjen e Konsumatorëve organizuan një protestë në Bulevardin "Dëshmorët e Kombit", siç bëhet çdo vit ku me rastin e Ditës së Verës, që përkon me Ditën Botërore të Konsumatorëve, ne organizojmë protesta. Të dielën, më 14 mars, ne i prezantuam publikut 10 njollat e turpit të konsumatorëve në Shqipëri. Në këto 10 raste ne gjykojmë se janë shkelur të drejtat e konsumatorëve. Rasti i parë dhe njolla e parë e turpit është Bashkia Tiranë për tre motive: e para, për një transport publik skandaloz të menaxhuar dhe të kontraktuar nga Bashkia Tiranë; E dyta, tregu i mishit dhe mungesa e një thertoreje, pasi vetë Bashkia e Tiranës ka pohuar se Tirana nuk ka nevojë për një thertore publike dhe, e treta, është mungesa e banjove publike. Ne nuk kishim bërë dallime, pasi tek njollat e turpit ishin edhe institucione që varen nga qeveria. Pra më saktë, ishte një format ku tre institucione i përkisnin opozitës dhe 3 mazhorancës. Një njollë tjetër ishte Grupi parlamentar i Partisë Socialiste për mosvotimin e ligjit për Gjykatat Administrative. Njolla tjetër më e rëndë është Bashkia e Durrësit, që nuk ka lënë asnjë centimetër plazh publik.

- Ju keni deklaruar se gjatë ndërhyrjes së Policisë Bashkiake ka pasur kërcënime edhe me jetë ndaj aktivistëve tuaj?

Kjo ishte një protestë shumë simbolike dhe kuptimplotë. Ajo që nuk kemi kuptuar ne, është se si ka mundësi që kryetari i Bashkisë Tiranë kalon në bulevard, sheh tabelat tona, acarohet dhe urdhëron drejtorin e Policisë Bashkiake dhe drejtorin e Inspektoratit të Lartë të Ndërtimit t'i shkatërrojë. I pari quhet Zyhdi Dajti dhe i dyti ka mbiemrin Broka. Të dy këta, megjithëse ishin pa uniformë, pa asnjë status, shkuan dhe dhunuan të gjitha tabelat që kishim vendosur në bulevard dhe ne kemi fotografuar tabelat e thyera në mes nga shkelmat e Zyhdi Dajtit dhe zotit Broka. Pasi kanë bërë këtë veprim, kanë vajtur aktivistët për të reaguar ndaj këtij akti vandal. Policia Bashkiake ka kërcënuar aktivistët me vdekje, duke u thënë që ne do t'iu zhdukim. Shefi i Policisë Bashkiake, Zyhdi Dajti ka kërcënuar një nga aktivistët e Lëvizjes "Zgjohu", duke i thënë që dy nga njerëzit që e shoqëronin, që nga pamja dukeshin të palarë, i kanë thënë që ju do të keni punë me këta. Ata ishin civilë, por ishin të armatosur. Po ashtu, në syrin tim i është bërë presion përfaqësuesit të Lëvizjes "Zgjohu", Zirkon Vishaj nga vetë Dajti, i cili i ka thënë në praninë time që bashkë do të flasim më vonë. Çfarë mund t'i thotë më shumë një drejtues i lartë i Bashkisë një përfaqësuesi të shoqërisë civile? Çfarë kuptimi ka kjo fjalë? Nuk është hera e parë që ne dhunohemi. Kjo është hera e dytë pas protestës "Rama çohu, shko në punë". Në këtë protestë iu paraqitën prova Prokurorisë dhe ajo e mbylli çështjen duke thënë se ishte një rrahje e lehtë.

-Ç'rol pati Policia e Shtetit?

Po të mos ishte Policia e Shtetit, do të shpërthente një dhunë e menjëhershme ndaj aktivistëve tanë, ashtu siç u dhunuam në 3 korrik, ashtu do të ndodhte dhe në bulevard. Ishte Policia e Shtetit që ndërhyri me vendosmëri, bllokoi ndërhyrjet vandale ndaj tabelave dhe shkatërrimin e tyre nga punonjësit e Bashkisë dhe mbi të gjitha, mbrojti aktivistët e Lëvizjes "Zgjohu". Si ka mundësi që ka rënë kaq poshtë Bashkia, ku drejtorët e mëdhenj të këtij dikasteri dhunojnë tabelat e protestuesve? Unë jam skandalizuar se si mund të ndodhë kjo ndaj një proteste të ligjshme, që ishte organizuar konform rregullave me leje nga Policia e Tiranës? Si ka mundësi që drejtuesi i opozitës jep urdhëra që të dhunohen protestues, kur ata zbatojnë ligjin? Standardi që ka Edi Rama është një standard që nuk e pranon ligjin kur nuk i pëlqen. Një njeri me këtë mentalitet që nuk duron njeri t'i dalë kundër, Zoti na ruajt nga ky kryetar, i cili nuk njeh asnjë kufi kur i preken interesat.

-Cili ishte reagimi juaj?

Unë mund të them që ne nuk kemi pasur kohë të reagojmë, pasi Policia Bashkiake iu vërsul tabelave duke i rrëzuar. Policia e Shtetit ndërhyri menjëherë, duke shpëtuar nga dëmtimi tabelat. Kur ne kemi kërkuar se çfarë po ndodh, Policia Bashkiake ka deklaruar se nuk e dinte që protesta ishte me leje. Ndërkohë që leja i është bërë prezent atyre prej meje që të premten, më datë 12 mars. Si mund të shkatërrosh diçka pa pyetur se e kujt është? Ajo që më shqetëson është se si drejtohet kjo Polici Bashkiake nga njerëz që marrin pozicione të fortësh me qytetarin. Unë dje jam skandalizuar nga komunikimin me këtë Polici Bashkiake me zotin Rama, i cili i komunikonte se çfarë duhet të bënte nëpërmjet telefonit.