Të monitorosh të famshmit 24 në 24 orë...!

Flet regjisori i “VIP Shpija”, Fisnik Vejsa. Ideja për “VIP Shpija” i ka lindur në një kafene, teksa bisedonte me mikun e tij të “Stupcave”. Kështu shprehet në intervistën që vijon, si regjisor i realiti-shout më të ri që shfaqet në kanalin “TV Shpija” në platformën “Tring Digital” satelitor. Ai tregon më tej pritshmërinë e këtij spektakli dhe mënyrën sesi është konceptuar. Regjisori është i bindur se pas një muaji, kur “VIP Shpija” të shpallë fituesin e saj dhe spektakli të mbyllet, gjithçka do të rezultojë si një sukses i madh.

- Fillimisht, na tregoni si lindi ideja për të bërë një reality shoë me VIP-at?

Fisniku: Në një bar të Prishtinës me Vedatin e “Stupcave”. E pyeta, a do të hyje në një “Shtëpi” me VIP-a, kurse ai m’u përgjigj: “Më lër të mendohem 24 orë...”. Të nesërmen më telefonoi dhe më tha se kishte dëshirë ta provonte veten të mbyllur, pasi dihet që “Stupcat” kanë shumë aktivitete në Gjermani, Zvicër, Amerikë etj. Pastaj, jemi takuar sërish me Vedatin e “Stupcave”, i cili konfirmoi pjesëmarrjen, por unë i thashë se do ta organizoj vetëm nëse hyni si grup, pra Vedati, Mensuri dhe Osmani. Kështu nisi ky shou me VIP-a, nga një bisedë me Vedatin e “Stupcave”. Qëllimi i këtij shou është që publiku të shohë se çfarë bën një i famshëm në jetën e tij të përditshme dhe këtë gjë shikuesit kanë mundësi ta ndjekin vetëm te “VIP Shpija”.

- Sa do të zgjasë “VIP Shpija”?

Fisniku: Do të zgjasë pesë javë dhe mendoj se do të rezultojë një spektakël madhështor. Dhe në fund njëri nga 12 garuesit VIP do të jetë fituesi. Ne kemi bërë të gjitha përgatitjet e duhura, madje kemi edhe një kanal të ri të veçantë, të quajtur “TV Shpija”, ku shikuesit shohin gjithçka që ndodh brenda 24 orëve në platformën “Tring Digital satelitor” për të gjithë shqiptarët kudo që ndodhen. Po ashtu, nominimet dhe eliminimet do të ndodhin më shpesh, çdo të tretën ditë do të ketë nominime, të cilat tashmë kanë nisur.

- Cili do të jetë shpërblimi për fituesin apo fituesen e këtij reality?

Fisniku: VIP-at tanë kanë hequr dorë nga shpërblimi kryesor, ndaj ky shpërblim do të shkojë për çështje humanitare dhe krahas kësaj do të ketë edhe dy aktivitete në ndihmë të njerëzve në nevojë. Është menduar që të ndërtohet një shtëpi dhe t’i dhurohet një familjeje nevojtare.

- Dihet se mjaft këngëtarë fitojnë shuma të konsiderueshme të hollash në evenimentet artistike dhe koncertet e ndryshme në Evropë. Sa para ju kanë kërkuar VIP-at për të qëndruar një muaj në “VIP Shpija”?

Fisniku: Për këtë nuk mund të them gjë...

Big Mama rreh me boks të gjithë shtëpinë...

VIP-ave u janë ndarë detyrat e radhës, të cilat ndryshojnë për secilin. Agim Gërguri kësaj radhe çlodhet, Bertan Asllani pastron dhomën e djemve, Fatos Kryeziu pastron oborrin e shtëpisë, ndërsa Kastro Zizo pastron dhomën e vajzave. Më tej “Stupcave” iu dha detyra për të gatuar drekën, Big Mama të pastrojë banakun dhe bilardon, Rezarta Shkurta të lajë enët, Afroviti Gogo ujit lulet, Drenusha Latifi pastron dhomën e ndenjjes dhe Rozana Radi lan tualetin. Ndërkaq, një ditë sportive e vështirë ka kaluar për banorët e “VIP Shpija”. I zoti i shtëpisë u mundësoi atyre që të ndiqnin ndeshjen e Ligës së kampionëve Barcelona-Arsenal, ndërsa banorëve iu dhanë fanella përfaqësuese të të dy ekipeve, të cilat ishin të detyruar që t’i mbanin të veshura gjatë gjithë lojës. Grupet u ndanë sipas skuadrave përkatëse dhe VIP-at u ulën përpara ekranit të lyer në fytyrë me ngjyrat e skuadrave. Të zhgënjyerit e mbrëmjes dolën Kastro Zizo dhe Osmani, të cilën “e vuajtën” humbjen e klubit të tyre të zemrës. Pas mbylljes së ndeshjes, banorët nisën të këndojnë, ndërkohë që i zoti i shtëpisë iu dha një tjetër detyrë sportive: ata duhej të zhvillonin një ndeshje boksi. VIP-at u pajisën me doreza, madje mes tyre kishte edhe një arbitër. Kështu ata u ndeshën mes tyre, por në fund triumfoi Big Mama.