Rovena: “Rozana më do”

Këngëtarja Rovena Stefa nuk di të pushojë fare, duke qenë e angazhuar nga një koncert në tjetrin. Pikërisht më 1 Maj, kur edhe u bë hapja solemne e sezonit veror në qytetin bregdetar të Sarandës, Rovena është gjendur në mesin e publikut sarandjot së bashku me motrën, Irvën, e cila tash së fundmi ka nisur të ndjekë rrugën e motrës së madhe. Nga ana tjetër, Rovena edhe këtë verë do të këndojë në Durrës, në klubin e saj veror, ku thotë se pushuesve do t’ua bëjë verën sa më të freskët.

E habitur me Rozin

Lidhur me komentet e shtypit rozë për përfoljen dhe ‘lavdërimin’ e Rozana Radit në shoun “VIP Shpija”, ajo me ironi shprehet: “Po ja, më do moj Mira, çka të bëj”. Në të vërtetë, ajo ndjehet e habitur që një njeri të mbajë përbrenda një mllef apo inat kaq të gjatë me vite, sidomos një artist. Por më tej nuk dëshiron të merret më shumë me këtë çështje, për t’ua lënë të tjerëve ta gjykojnë.

“Top Festi”, festival i rrogëtarëve të tij

Së fundmi, Rovena në duet me Irvën është paraqitur shumë seriozisht në edicionin e ri të festivalit të muzikës moderne “Top Fest 7”. Kënga e saj “E gjej” e rrymës R&B-Dance është kompozuar nga Stine, por ajo, edhe pse mori komente pozitive në forume të ndryshme, u skualifikua pa mbërritur akoma në gjysmëfinale. Kjo këngë, në të vërtetë, e kthente Rovenën pas disa vjetësh mungese në skena festivalesh. Po si dhe pse vendosi Rovena të rikthehet pikërisht në këtë festival? Ajo shpjegon se një hap të këtillë e ka marrë pasi i është bërë ftesa nga drejtori artistik, Dorian Gjoni, për të sjellë ndryshime në këtë festival, por krahas kësaj janë edhe dy arsye të tjera: këndimi i gjallë në skenë dhe dëshira për të prezantuar për herë të parë motrën e saj Irvën para publikut.

Sipas saj, 80 këngëtarë nga 120 sa kanë qenë në konkurrim janë skualifikuar nga një bord fantazmë prek 4 vetash: Dorian Gjoni, Alessia, Adrian Proko dhe një anonime-të gjithë pjesë e stafit të programeve komerciale në “Top Channel”. Sipas Rovenës, aty janë kualifikuar ata këngëtarë që janë rrogëtarë të këtyre programeve, ndërsa këtë eveniment ajo e quan të dalë mode dhe të kthyer në një festival të mbyllur brenda kornizave të tij, duke vepruar ngjashëm me sistemet totalitare, ku në shërbim të një individi shfrytëzohet masa e gjerë. Prandaj, ajo mendon se nuk është çudi që festivalin “Top Fest 7” ta fitojë Dorian Gjoni dhe orkestra e tij, me dirigjente Alessia-n!