Presidenti Sejdiu nderon zonjën e muzikës shqiptare!

Me rastin e 77-vjetorit të lindjes së Nexhmije Pagarushës

Për herë të parë Presidenti i Republikës së Kosovës, dr. Fatmir Sejdiu ia ka akorduar një artisti një çmim kaq të madh si është çmimi “Artist i merituar”, dhe i takoi padyshim një prej zërave më të çmuar të muzikës shqiptare, Nexhmije Pagarushës. Në një ceremoni të veçantë të organizuar në Presidencë, presidenti Sejdiu priti znj. Nexhmie Pagarusha, të cilën e dekoroi me çmimin “Artiste e Merituar” për veprimtarinë dhe kontributin e veçantë dhënë kultivimit të muzikës dhe këngës së përsosur shqipe, teatrit dhe filmit. Nëse kishte një artist në Kosovë, por edhe në Shqipëri që meriton këtë nderim të lartë, patjetër që ka vetëm një emër, Nexhmije Pagarusha. Sepse ajo ka qenë gjithmonë një ambasadore e kulturës shqiptare kudo nëpër botë, ku ka prezantuar këngën shqipe megjithë sharmin e saj.



“Kontributi i Nexhmije Pagarushës në fushën e krijimit, kultivimit, interpretimit dhe të promovimit të artit muzikor shqiptar është i një rëndësie të jashtëzakonshme. E përkushtuar gjithë jetën për të ngritur vlerat e artit muzikor, duke krijuar identitet referues kulturor, duke qenë zë i fuqishëm i shpirtit dhe vlerave estetike shqiptare, ajo ishte dhe mbetet shenjë identifikuese e Kosovës dhe simbol i artistit që me veprën e vet komunikon në mënyrë autentike dhe përherë frymëzuese me një audiencë të gjerë muzikore. Ajo është shembulli më i mirë i personalitetit që tërë jetën ia kushtoi zhvillimit dhe ngritjes së artit dhe kulturës shqiptare dhe si e tillë ajo është frymëzim nxitës për brezat krijues dhe interpretues të artistëve”, - u shpreh në arsyetimin e dekorimit të znj. Pagarusha, Presidenti Sejdiu. Ky dekorim vjen me rastin e 77-vjetorit të lindjes së këngëtares Pagarusha si një nderim dhe përulje për vitet që ajo i kushtoi skenës dhe këngës shqipe, një kontribut që e radhitë atë në plejadën e artë të kulturës dhe artit shqiptar.

Ndërkaq këngëtarja e madhe e skenës shqiptare, Nexhmije Pagarusha me këtë rast falënderoi Presidentin për këtë nderim që i bënë asaj, si dhe të gjithë ata që e kanë mbështetur ndër vite.

Iniciativa për këtë çmim ishte e Radio Televizionit të Kosovës, që u përkrah edhe nga 39 intelektualë dhe artistë të vendit. Nexhmije Pagarusha është një nga këngëtaret më të njohura të Kosovës, fituese e shumë shpërblimeve dhe laureate e disa çmimeve të njohura. Prej kohësh ajo mban epitetin ”Bylbyli i Kosovës”.