Top Fest 7, nata finale

Edicioni i shtatët i Festivalit të muzikës moderne shqiptare, Top-Fest, sot (e diel) do të mbajë natën finale, me ç’rast krahas çmimeve të shumta do të shpallet edhe fituesi i sivjetmë.
“Top Fest Awards”, një mbrëmje spektakli që sivjet pritet me padurim të veçantë për shkak të risive teknologjike që po flitet se do ta karakterizojnë atë, do të sjellë të gjithë këngëtaret finalistë, por edhe orkestrën e Top Channel në një performancë të drejtpërdrejtë.
“Top Fest 7” ka filluar në shkurt, ndërsa në të kanë marrë pjesë 130 këngëtarë dhe grupe nga Shqipëria, Kosova dhe Maqedonia. Katër netët gjysmëfinale, sollën në skenë 40 grupe dhe këngëtarë, si Eneda Tarifa, Valon Shehu, Besa, “Jericho”, “NRG Band”, Jonida Maliqi, ne bashkëpunim me Big Basta, “Troja”, Gerti Gjoni, Mariza Ikonomi, Karolina Lopez etj.
Drejtuesi artistik i festivalit, Dorian Gjoni, thotë se nata finale do të jetë e përmasave të mëdha: “Kemi përzgjedhur 19 këngë, 4 grupe, 4 apo 5 meshkuj, dhe të tjerat janë femra”
Me një votim të hapur, publiku nga Shqipëria dhe Kosova nëpërmjet sms-ve do të zgjedhë këngëtarin më të mirë, dhe se bashku me vlerësimin e jurisë do të përcaktohet edhe fituesi.
Në natën finale të “Top Fest 7” do të ndahen edhe 10 çmime të tjera: Këngëtari më i mirë i ri, Këngëtarja femër dhe Këngëtari mashkull me i mire, Kënga më e mirë "Pop&Rock", Kënga më e mirë "Hip Hop & RNB", Interpretuesi më i mirë, Video më e mirë apo Grupi më i mirë.