Meta takoi Sekretarin e Jashtëm Britanik, Hague

Në kuadër të Takimit të Nivelit të Lartë të Sarajevës, Zv.
Kryeministri dhe Ministri i Punëve të Jashtme, Ilir Meta zhvilloi një
takim të veçantë me Sekretarin e Jashtëm të Mbretërisë së Bashkuar,
William Hague.

Meta dhe Hague diskutuan mbi intensifikimin e bashkëpunimit
bilateral, procesin e integrimit evropian të Shqipërisë si dhe mbi
situatën politike në vend.

Sekretari i Jashtëm Hague shprehu kënaqësinë për të bashkëpunuar me
z. Meta, duke theksuar këtu mbështetjen që Britania e Madhe i jep
reformave të ndërmarra nga Qeveria shqiptare, veçanërisht në fushën e
luftës kundër krimit të organizuar dhe trafiqeve të paligjshme. Zv.
Kryeministri Meta, në këtë kontekst, e siguroi Sekretarin Hague për
vendosmërinë e Qeverisë shqiptare për të ecur përpara në zbatimin e
reformave të ndërmarra dhe theksoi gatishmërinë e Shqipërisë për të
forcuar më tej bashkëpunimin me Britaninë e Madhe në këto fusha.
Gjithashtu, Meta e informoi Hague mbi përmbushjen e kritereve nga
Shqipëria për liberalizimin e vizave dhe e siguroi atë se tre
nën-çështjet e mbetura do të plotësohen shumë shpejt.

Dy homologët shprehën vullnetin e veçantë për të intensifikuar
bashkëpunimin dypalësh, me një fokus të veçantë në rritjen e investimeve
britanike në fusha prioritare të ekonomisë shqiptare.

Lidhur me zhvillimet në rajon, Hague shprehu vlerësimin e tij për
rolin e veçantë që Shqipëria luan në Ballkan, duke veçuar këtu vizitën e
fundit të z. Meta në Beograd si një hap pozitiv drejt përmirësimit të
marrëdhënieve mes dy vendeve dhe si një kontribut ndaj përmirësimit të
klimës në rajon.

Hague theksoi këtu se Ballkani Perëndimor do të jetë një prioritet
shumë i rëndësishëm i Britanisë së Madhe duke nënvizuar se kjo është
arsyeja që ai ndodhet në Sarajevë, për të konfirmuar pikërisht këtë
vullnet të fortë të Qeverisë së re britanike për Ballkanin.

Meta dhe Hague diskutuan gjithashtu edhe mbi situatën politike në
vend, duke nënvizuar rëndësinë e gjetjes së një zgjidhjeje sa më shpejt,
e cila do të çojë në përmirësimin e klimës së brendshme politike.

Në fund Meta e ftoi z. Hague për një vizitë zyrtare në Tiranë, ftesë
të cilën ai e pranoi me kënaqësi.