Berisha fton Presidentin e SHBA-ve, Obama, që të vizitojë Shqipërinë

Me rastin e Ditës së Pavarësisë, kryeministri shqiptar Sali Berisha i ka dërguar një telegram urimi presidentit amerikan, Barak Obama.
“Në këtë ditë të shënuar për vendin dhe kombin tuaj ndihemi të lumtur që marrëdhëniet dhe lidhjet ndërmjet dy vendeve e popujve tanë miq kanë njohur vetëm zhvillime pozitive dhe janë më të mira se kurrë. Mbështetja e Shteteve të Bashkuara të Amerikës për anëtarësimin në NATO përbën një demonstrim të shkëlqyer të këtyre marrëdhënieve dhe të bashkëpunimit të ngushtë e të frytshëm ndërmjet të dyja vendeve”, thuhet në mesazhin e kryeministrit Sali Berisha.
Më tej ai vë theksin në vullnetin e Shqipërisë për të thelluar bashkëpunimin me Uashingtonin. “Populli shqiptar dhe qeveria shqiptare janë thellësisht mirënjohës për ndihmën e asistencën e vazhdueshme e të gjithanshme të SHBA-ve. Kjo ndihmë përbën një kontribut të çmuar që reformat e ndërmarra nga qeveria shqiptare të kenë rezultate pozitive, konkrete dhe të shpejta. Shqipëria do të vazhdojë më tej me vendosmëri në realizimin e reformave të ndërmarra dhe në përmbushjen e objektivave madhore kombëtare të integrimit të plotë euroatlantik, si dhe për konsolidimin e mëtejshëm të demokracisë e të ekonomisë së tregut dhe për përparimin e vendit tim”, shton Berisha.
"Në aspektin rajonal, Shqipëria do të vazhdojë të rrezatojë stabilitet e modernizim dhe të promovojë bashkëpunimin e miqësinë, duke kontribuar aktivisht në integrimin sa më të shpejtë të rajonit ballkanik në strukturat euroatlantike. Duke vlerësuar rolin dhe kontributin e rëndësishëm e udhëheqës të SHBA-ve për paqen e stabilitetin në rajonin tonë, veçanërisht për njohjen e fuqizimin e shtetit më të ri në rajon, atë të Kosovës, më lejoni t’ju siguroj se vendi im do të mbetet një partner i vendosur dhe konstruktiv, në këtë drejtim.
Duke ju përsëritur edhe një herë urimet më të ngrohta, gjej rastin t’ju ripohoj dëshirën time dhe të të gjithë shqiptarëve për t’ju pritur në Tiranë si mik i madh dhe i shquar i kombit shqiptar", thuhet në fund të mesazhit të kryeministrit Berisha.