Topalli: Vendimi i GJND-së lexohet në të gjitha gjuhët, por në shqip tingëllon më së bukuri

Kuvendi i Shqipërisë, ndërpreu sot punimet e seancës plenare për të përcjellë drejtpërdrejt leximin e vendimit të Gjykatës Ndërkombëtare të Drejtësisë në lidhje me pavarësinë e Kosovës.

Pas përfundimit të shpalljes së opinionit të GJND-së, Kryetarja e Kuvendit, Jozefina Topalli në emër të Kuvendit përshëndeti këtë vendim dhe tha: “Ky vendim mund të lexohet në të gjitha gjuhët e botës, por ai tingëllon më bukur në gjuhën shqipe dhe sot është një vendim i jashtëzakonshëm.

Pavarësia e Kosovës, për të cilën kemi punuar të gjithë bashkë gjatë të gjithë kësaj periudhe, është e pakthyeshme. Falënderoj të gjithë ato vende që e kanë njohur Kosovën dhe e kanë mbështetur Kosovën në këto periudha të vështira për rajonin dhe, në mënyrë të veçantë, për shqiptarët.

Ky është një vit i jashtëzakonshëm për të gjithë shqiptarët, për shqiptarët në Kosovë, për shqiptarët në Shqipëri, për shqiptarët kudo që janë. Unë ju falënderoj për çdo gjë që ju keni bërë në mbrojtje të Kosovës, kudo që keni shkuar, për çdo përpjekje, për të gjitha këto ju faleminderit", tha Topalli.