Shqipëria në NATO, debate për kontributin pozitë-opozitë

30/03/2009

TIRANË- Hyrja e Shqipërisë në NATO dhe kontributi i palëve politike në këtë arritje është bërë temë debati në seancën e sotme në Kuvendin e Shqipërisë. Në pjesën jashtë rendit të ditës, në atë të debatit të lirë, deputetët e opozitës kanë theksuar edhe njëherë rolin deciziv të dhënë në këtë proces shumë të rëndësishëm për vendin. Deputeti Taulant Balla, duke iu referuar turit të fundit të kryetares së Parlamentit, Jozefina Topalli ka deklaruar se ajo po hedh baltë mbi rolin e opozitës. "Ti zonjë që nuk di të falënderosh, të paktën mos mallko. Sepse Shqipëria në NATO nuk bëhet as me armë e as me mallkime"- tha Balla. Ai shtoi më tej, se askush nuk mund të mohojë të drejtën e kontributit të pazëvendësueshëm të Partisë Socialiste dhe të kryetarit të saj në veçanti. "Ne nuk matim forcat me ty dhe ekipin tënd, po jemi këtu për t'i shërbyer shqiptarëve"- tha ai.

Ndërkohë, zëvendëskryeministri Genc Pollo, duke vlerësuar rolin e opozitës, ka shtuar se gjithsesi ajo është xheloze për atë që ai e ka përcaktuar si 'arritje e kundërshtarit'. "Jam i bindur se zgjedhjet parlamentare do jenë më të mirat e bëra ndonjëherë. Opozita është deklaruar pro NATO-s, por në vendimmarrjet kritike, dilema mes dëshirës për mbarëvajtjen e vendit dhe xhelozisë për kundërshtarin, opozita ka anuar nga e dyta"- tha ai.


Braçe: Qeveria ka harruar shtresat në nevojë

Nënkryetari i grupit parlamentar të PS-së, Erion Brace i ka bërë thirrje qeverisë të mobilizohet për të garantuar kushte më të mira për kategoritë sociale në nevojë. Nga foltorja e Kuvendit ai ka kërkuar nga qeveria të jetë më e ndjeshme ndaj kërkesave të shtresave vulnerabël, duke kujtuar problemin dhe ankesat e mëdha të ngritura nga shoqata e të verbërve në vendin tonë.
"Të verbërit e Shqipërisë, po kërkojnë të drejtat e tyre të mohuara. Do doja t'i ktheni përgjigje kësaj kategorie që ata të marrin atë që u takon në bazë të vendimeve të qeverisë. Nëse të verbrit fillojnë grevën, do të jetë shumë e rëndë për imazhin e Shqipërisë, edhe për ju si qeveri, që në rastin e paraplegjikëve u ndjetë ngushtë kur ju përplasën derën në fytyrë"- tha Braçe.