Shtëpitë më të shtrenjta në botë

Çmimi i shtëpive më të shtrenjta në botë për vitin 2010 është i padiskutueshëm. Po, po, nuk mund të flitet për ulje çmimi, kur sheh se shtëpia që renditet në krye të listës së më të shtrenjtave, kushton plot 1 miliard dollarë. Fundja, sot, biznesi i shitjes së shtëpive është një ndër më fitimprurësit, prandaj edhe kur diskutohet për shifrat, nuk ka se si të diskutohet për çmimet.

Në vendin e parë renditet një shtëpi e cila përveçse më e shtrenjta në botë, ka edhe një arkitekturë të rrallë. Bëhet fjalë për shtëpinë “Antilla” në Mumbai, e cila është në pronësi të një prej 5 njerëzve më të pasur të universit, Mukesh Ambani. I zoti i shtëpisë, një biznesmen i suksesshëm në fushën e naftës dhe tregut farmaceutik, ka ndërtuar një shtëpi, e cila, në fakt, nuk ka lidhje aspak me një vilë të zakonshme, por me një vepër arti, e cila në aspektin inxhinierik pa pikë dyshimi mbetet më e rralla në të gjithë globin. Kjo është arsyeja që shtëpia më e shtrenjtë në botë kushton plot 1 miliard dollarë. E klasifikuar në vendin e parë si shtëpia më e shtrenjtë për vitin 2010 “Antilla” ka tavane të dyfishta prej kristali, dhomat e saj kanë dimensione të paimagjinueshme: të vogla dhe super të mëdha, banja me aksesorë prej platini, kristali dhe ari. Ajo që është e veçantë në këtë shtëpi, lidhet me faktin se përpos teknologjisë që është përdorur, aty nuk ke shansin të përdorësh celular, e gjithë kjo për faktin se pronari i shtëpisë ka ndaluar interferimin e valëve brenda vilës së tij përrallore.

Në vendin e dytë të listës së shtëpive më të shtrenjta në botë renditet vila “Leopolda”. Vila e famshme “Leopolda” ndodhet në Nice të Francës dhe për shumë vite ishte në vendin e parë të listës së shtëpive më të kushtueshme. Ajo ka një hapësirë gjigande prej 100 hektarësh dhe i jep kësaj shtëpie një frymëmarrje të paimagjinueshme. Vila është ndërtuar në vitin 1900 nga mbreti Leopold II i Belgjikës dhe në kohët moderne u ble nga Bill Gates. Gjatë kohës që ishte në pronësinë e tij, ajo renditej si shtëpia më e shtrenjtë në botë për shkak të futjes së teknologjisë së lartë në një pjesë të saj, sidomos në zonën e sigurisë. Aktualisht “Leopolda” është blerë nga mandati rus Roman Abramovich dhe ka 19 dhoma gjumi, të gjitha të mobiluara me stilin e vjetër: dhoma ngrënieje, sallë lojërash dhe kinemaje, hapësira për të kalëruar, kantina vere dhe një vresht fantastik prej 8 mijë hektarësh, një nga më të vjetrit në Francë dhe kushton 600 milionë dollarë.

Në vendin e tretë renditet një nga shtëpitë më të shtrenjta, por edhe më të veçanta, “Hyde One”, që kushton plot 200 milionë dollarë dhe është e famshme në të gjithë botën pasi është ndërtuar mbi një panel gjigand plumbi, madje edhe orenditë përbëhen nga ky metal, duke i dhënë asaj një freski të përhershme.

Shtëpia e miliarderit të Ira Rennert kushton 180 milionë dollarë dhe renditet e katërta, por ndryshe nga një banesë e zakonshme, ajo është një kompleks gjigand banimi me 29 dhoma gjumi, 39 banja, një dhomë ngrënieje, salla sporti, pishina si dhe një fushë golfi, duke e çuar çmimin e saj në listën e shtëpive më të kushtueshme në botë.

Në kodrën e Beverly Hills mund të gjesh shtëpinë që renditet e pesta, është tejet luksoze dhe ka për pronar botuesin William Randolph Hearst. Vila ka 29 dhoma gjumi dhe tre pishina. Shtëpia u bë e njohur sidomos kur u mor me qera gjatë xhirimeve të filmit “Kumbari”. Nëse dëshiron vërtet të kesh një shtëpi me fqinjë të famshëm, aty do të gjesh familjet e Tom Cruise dhe David Beckham. Vila kushton 165 milionë dollarë.

Një tjetër shtëpi e rrallë që renditet e gjashta, është ajo e Edra Blixseth që ndodhet mal, pra një shtëpi dimërore, e cila përveçse një panorame fantastike ka plot 10 dhoma fjetje. Ajo që e bën të veçantë këtë shtëpi dimërore është se ajo ka dysheme me ngrohje dhe të gjitha dhomat kanë brenda zjarr, madje edhe në çdo banjë, duke e çuar çmimin e kësaj shtëpia në shifrën e 155 milionë dollarëve.

E gjashta për nga klasifikimi, por jo nga rëndësia është shtëpia e Aaron Spelling e quajtur “The Manor”. Ajo ka një arredim fantastik në plot 123 dhomat e saj, ka një pistë patinazhi, dy pishina, tri kuzhina, dy salla sportive, një kopsht privat dhe një sallë ku mund të luash bouling. Shtëpia është ndërtuar në vitin 1991 dhe kushton plot 150 milionë dollarë, çmim që nuk ka ndryshuar gjatë 15 viteve të fundit.

“UpdoWn Court” është shtëpia që renditet e shtata. Aty mund të ndihesh i privilegjuar vetëm sepse ke fqinjë si Elton John apo Mbretëresha e Anglisë. Edhe pse ende është një shtëpi e pashitur, në hapësirën e saj mund të gjesh 24 dhoma gjumi, banja fantastike me mermer të sjellë nga Egjipti, një garazh gjigand nëntokësor dhe gardërobën me hapësirën më të madhe që mund të ekzistojë në të gjitha banesat e Evropës. Kostoja e shitjes arrin në 140 milionë dollarë, por duket se kjo nuk është arsyeja e mosshitjes. Flitet se arredimi i saj i stilit barok kërkon një tjetër investim: nëse duhet mbajtur nën të njëjtën cilësi, duhet shembur, pasi për të pasur një mobilim modern, kjo mund do të ndikojë dukshëm prishjen e imazhit të një prej shtëpive më të shtrenjta dhe të vjetra në Londër.

Në listën e shtëpive luksoze me çmime të paimagjinueshme është edhe kështjella e Drakulës në Rumani që kushton 135 milionë dollarë. Ajo pozicionohet në vendin e tetë edhe pse realisht, mbetet si një prej banesave që nuk ka dalë në shitje, përpos vlerësimit që i është bërë nga agjentët imobilarë. E veçanta e kësaj shtëpie-kështjellë është se ajo ka vetëm një hyrje dhe është tej mase e fortifikuar. Kështjella është ndërtuar në shekullin e 14 dhe sot konsiderohet monument kombëtar. Në të ndodhen 57 dhoma në total, ku përfshihen 17 dhoma gjumi të mbushura me objekte antike dhe historike, të cilat duket se nuk u trashëguan as nga konti Drakula apo pasardhësit e tij. Dilema e shtetit para ofertave të shitjes apo jo të kësaj kështjelle vazhdon të jetë e vështirë, pasi të ardhurat që vijnë në arkën e shtetit nga 45 milionë vizitorët, vazhdojnë të jenë shumë të larta.

E fundit, pra në vendin e nëntë renditet shtëpia e manjatit Donald Trump. Sigurisht që Trump nuk do të mendonte për asgjë tjetër në këtë botë, nëse nuk do të investonte sa duhet për shtëpinë e tij. Ai zotëron një pallat që mban edhe emrin e tij me plot 18 dhoma ujore, pasi shtëpia ndodhet në Florida, ka hapësira për sport dhe argëtim, të cilat në total e çojnë çmimin e shtëpisë në shifrën 125 milionë dollarë.