Universiteti i Tiranës, mbeten 170 vende bosh

Përfundon afati i regjistrimeve për fazën e ndërmjetme të pranimit në universitet. Pas kësaj faze në Universitetin e Tiranës rezulton se kanë mbetur 170 vende bosh. Të gjithë ata që nuk kanë mundur të fitojnë deri tani në asnjë prej preferencave, do të ketë edhe një shans të fundit. Ministria e Arsimit ka vendosur që APRIAL-i të shpallë listën përfundimtare të fituesve, e cila do të publikohet në datën 6 tetor.

Regjistrimet e fituesve të kësaj faze do të mbyllen në datën 9 tetor, dy ditë para nisjes së vitit të ri akademik. Kandidatët, të cilët në listat përfundimtare do të shpallen fitues në një program studimi të një preference të tyre më të lartë se ai i regjistrimit të ndërmjetëm, do të çregjistrohen automatikisht nga sekretaritë mësimore, nga programi i studimit ku ishin regjistruar më parë. Ministria e Arsimit dy ditë më parë u ka bërë thirrje kandidatëve të jenë të kujdesshëm me proceduarat, pasi në rast se nuk i kryejnë, rrezikojnë të humbin të drejtën e shkollës së lartë. Viti i ri akademik nis

më 11 tetor. Këtë vit ulen për herë të parë në auditorë më shumë se 22 mijë studentë. Me listën përfundimtare të fituesve mbyllet procesi i pranimit në shkollat e larta për sistemin e ditës. Në tetor priten të bëhen publike kuotat e pranimit për sistemin part-time, si dhe procedurat e regjistrimit.

Universiteti i Tiranës

Fakulteti i Shkencave Sociale 14 vende
Fakulteti Ekonomik 16 vende
Fakulteti i Historisë dhe Filologjisë 4 vende
Fakulteti i Drejtësisë 5 vende
Fakulteti i Gjuhëve të Huaja 58 vende
Fakulteti i Shkencave të Natyrës 38 vende
Fakulteti i Infermierisë 31 vende
Fakulteti i Mjekësisë 4 vende

Tafaj: Bashkia përgjegjëse për mbipopullimin e klasave

"Mbipopullimi në shkollat e Tiranës do të jetë problem derisa bashkia të japë leje për ndërtimin e shkollave të reja". Këtë deklaratë bëri dje gjatë raportimit në komisionin parlamentar të medias ministri Myqerem Tafaj. "Për të ndërtuar shkollat duhen sheshe. Të gjejmë sheshet. Ne jemi gati t'i vëmë në dispozicion të Bashkisë së Tiranës fonde për të ndërtuar shkolla", tha Tafaj. Kreu i arsimit u shpreh dhe për lëvizjet e mësuesve në disa rrethe të vendit. Sipas tij, ata nuk janë bërë për qëllime politike, ndërkohë që korrupsioni në arsim është një nga prioritet e dikasterit që ai drejton. Ndërkohë, deputetët e opozitës bënë një sërë akuzash për problematikat në arsimin parauniversitar. "Në Poliçan një njeri me precedentë penalë që quhet Fatos Aliaj, me shkollë të mesme të mbaruar natën, shkoi të japë mësim dhe të bëhet mësues fizkulture, kur nuk ka lidhje me sportin", tha Fidel Ylli. Ndërkohë që sipas Tafajt, një nga nismat më të fundit që po ndërmerr Ministria e Arsimit si pjesë e reformës është dhe ajo e përgatitjes së mësuesve për dy lëndë, një metodë kjo, e ndjekur në Europë. Deputetja Ledi Shamku u shpreh se ministria ka braktisur nxënësit. "Me një vullnet të një grupi miqsh po ju siguroj që në 5 ditë kemi mbledhur 5 mijë abetare dhe do i nisim për aty ku nxënësit janë krejtësisht të braktisur nga ju", tha Ledi Shamku. Ministri iu përgjigj kësaj akuze, duke deklaruar se në momentin që në MASH ka një kërkesë të vërtetuar për kurrikula në gjuhën shqipe, pranë shkollave ku studiojnë fëmijët e emigrantëve, ministria u dërgon falas tekstet.