Ferrari shitet para premierës

Ylli i hapësirës reklamuese të Ferrarit në panairin e automjeteve të Parisit, i cili vizitorëve ua hap dyert javën e ardhshme, do të jetë automjeti të cilin në Ferrari e cilësojnë si “më ekskluzivin deri më tani”.

Ky titull duket se nuk është i fryrë shumë kur merret parasysh se e tërë seria e planifikuar tanimë është shitur.

Ferrari planifikon të prodhoj vetëm 80 njësi të versionit kabriolet të modelit 599 të cilin e quajnë SA APERTA. Automjeti është përpunuar për nder të kompanisë së dizajnit Pininfarina, e parashtesa SA qëndron për emrat Sergio e Andrea Pininfarina.

Klientëve të përzgjedhur ky automjet u është paraqitur javën e kaluar gjatë prezantimit Pebble Beach Concours në California. Qysh atëherë prodhuesi italian i ekzotikes super-automobilistike ka grumbulluar letrat e blerësve potencialë, ani pse shumë prej tyre ende nuk e kanë ditur tamam çmimin e këtij modeli të ri, i cili do të duhej të kushtonte 400.000 euro.

Në Ferrari janë paksa dorështrënguar kur bëhet fjalë për detajet teknike, mirëpo dihet se ky automjet ka motor 6.0-litërsh V12 i cili zhvillon 670 kuaj fuqi që do të duhej t’i mundësonte atij performansa po aq të mira sa në modelin tjetër 599 GTO.