Shqipëria së shpejti me bashkëpunim më të zgjeruar me Google

[b]Ministria e Brendshme e Shqipërisë ka gati të gjithë materialin e nevojshëm dhe po shqyrton mundësinë e kontaktimit me kompaninë Google, në mënyrë që të dhënat elektronike të adresave të qytetarëve shqiptarë, si dhe hartat vektoriale të mund të kalojnë edhe në kuadër të gjigantit botëror të internetit.
Nëse do të mund të realizohet marrëveshja me këtë kompani, qytetarët shqiptarë do të mund të gjejnë në këtë faqe interneti adresën e tyre të banimit apo edhe atë të personave për të cilën ata janë të interesuar.

Zv/ministri i Brendshëm, Ferdinand Poni, u shpreh ndër të tjera se “ekzistojnë të gjitha kushtet dhe jemi në prag të fillimit të bisedimeve me kompaninë e internetit Google, në mënyrë që të dhënat elektronike të adresave të qytetarëve, të mund të transportohen edhe në këtë faqe”.

Sipas Ponit, mbi 230 njësi vendore, më të mëdhatë në vend, që mbulojnë rreth 3.5 milionë banorë, ose 85 për qind të saj, kanë përfunduar hartat territoriale, ku janë pasqyruar emërtimet publike për çdo rrugë, rrugicë, bulevard, shesh publik, ndërkohë që është i gatshëm dhe materiali për sistemet e identifikimit territorial me përjashtim të disa komunave, me më pak se 3000 banorë.

Në vazhdim të ecurisë së këtij procesi, zv/ministri Poni bëri të ditur gjithashtu se “për shkak edhe të teknologjisë së avancuar si dhe praktikave më të mira mbi të cilat është i bazuar ky sistem, është menduar që pas muajit shtator 2010, të fillojë popullimi i të gjitha ndërtesave”. Kjo, sipas tij, do të bëjë të mundur krijimin e një baze të qartë të dhënash në bashkitë e komunat në vend dhe në serverin qendror të Drejtorisë së Përgjithshëm të Gjendjes Civile në Ministrinë e Brendshme.