Shqipëria, zyrtarisht në NATO!!

02/04/2009

TIRANË - Shqipëria është zyrtarisht anëtare me të drejta të plota në NATO. Dje, përmes një ceremonie në Departamentin Amerikan të Shtetit, zëvendëssekretari Steinberg, pranoi instrumentet e aderimit në Traktatin e Atlantikut të Veriut për Shqipërinë dhe Kroacinë, për të cilat ShBA-ja është qeveria përgjegjëse për marrjen në dorëzim. Në momentin që zëvendëssekretari mori instrumentet e aderimit, Shqipëria dhe Kroacia u bënë Aleate të NATO-s.


Shqipëria dhe Kroacia u përfaqësuan dje në ceremoni nga ambasadori shqiptar, Aleksandër Sallabanda dhe ambasadori kroat, Kolinda Grabar-Kitarovic. Në deklaratën e Departamentit Amerikan të Shtetit, thuhet se, "ne e mirëpresim përmbylljen e procesit të aderimit para Samitit të 60-vjetorit me NATO-n, më 3 dhe 4 prill, ku Kryeministri shqiptar, Sali Berisha dhe Kryeministri kroat, Ivo Sanader, do të zënë vend për herë të parë, duke përfaqësuar vendet e tyre si anëtare të Aleancës". Në këtë mënyrë, në samitin e ardhshëm, Shqipëria do të marrë pjesë si anëtare me të drejta të plota e NATO-s, ashtu si edhe Kroacia.


Lajmi për anëtarësimin me të drejta të plota të Shqipërisë dhe Kroacisë mbërriti në Bruksel, në momentin kur zëdhënësi i NATO-s, James Appathurai, po zhvillonte konferencën e tij për shtyp. Për pasojë, ai bëri edhe komentin e parë zyrtar të selisë së NATO-s. "Ky është një lajm shumë i mirëpritur. Shqipëria dhe Kroacia kanë punuar shumë fort për të përmbushur standardet e Aleancës në lidhje me demokracinë dhe me situatën e mbrojtjes. Ato kanë kapërcyer atë që jo shumë kohë më parë ishte një periudhë e vështirë e historisë së Ballkanit, për t'u kthyer në kontribuues për stabilitetin rajonal dhe të sigurisë ndërkombëtare nëpërmjet NATO-s, edhe para anëtarësimit. Tani ata do të marrin pjesë plotësisht në këtë aleancë. Ata do të kenë zërin e tyre të plotë e të barabartë me të gjithë aleatët e tjerë, kur NATO-ja të marrë vendimet e saj. Dhe ata do të përfitojnë nga siguria kolektive, që ofron Aleanca, por ata do të mbajnë, gjithashtu, mbi supe, përgjegjësitë që kërkon kjo siguri kolektive në mes aleatësh",- tha Appathurai.


Ndërkohë, pak minuta më pas, vetë Sekretari i Përgjithshëm i NATO-s Jaap de Hoop Scheffer, përmes një komunikate për shtyp, përshëndeti dy anëtarët më të rinj të kësaj aleance. Po dje, Sekretari i Përgjithshëm i NATO-s, i telefonoi Kryeministrit Sali Berisha, duke i përcjellë urimet për anëtarësimin e Shqipërisë. Ndërsa në konferencën për shtyp, të zhvilluar pikërisht për Shqipërinë në NATO, Kryeministri Berisha deklaroi ndër të tjera se, një mirënjohje e veçantë në këtë proces i përket ish- Presidentit të Shteteve të Bashkuara Xhorxh W. Bush, qeverisë së Shteteve të Bashkuara të Amerikës, Presidentit Obama dhe administratës së tij, pa mbështetjen e të cilëve, ky proces do të ishte i pamundur. Ndërkohë, më 7 prill, pas Samitit të Strasburg/Kehl-it, në selinë e NATO-s, në Bruksel, do të zhvillohet edhe ceremonia e ngritjes së flamujve të Shqipërisë dhe Kroacisë, krah 26 vendeve të tjera aleate.