Ivan Bogdanov, ai që dogji flamurin shqiptar

Mediat italiane bënë të ditur se ishte arrestuar ultrasi serb, që dogji flamurin shqiptar në stadiumin e Xhenoas. Policia italiane, një ditë pas dhunës së ndeshjes Itali-Serbi, që u ndërpre përfundimisht në minutën e 7-të të lojës, vuri në pranga 17 ultras serbë, mes të cilëve edhe kapon, njeriun që dogji flamurin shqiptar. Quhet Ivan dhe mbante në gjoks tatuazhin e një bombe. Ky është personi me maskë të zezë, lideri i tifozerisë serbe, që udhëhoqi revoltën në stadiumin “Marassi” të mërkurën. Po kush është ky njeri? Ivan Bogdanov është tepër i njohur në Beograd. Është kapoja i tifozëve të Cervena Zvezdës, të njohur si tepër fanatikë. Ivani ka një bombë dore të bërë tatuazh në pjesën e djathtë të gjoksit, si edhe vitin 1389 në krah. Është viti i betejës së Fushë-Kosovës, kur ushtria serbe u mund nga ajo turke, por që në atë kohë nisi shpirti ultra-nacionalist serb. Bogdanov është 29 vjeç dhe skeda e tij penale është e mbushur me sherre, fyerje, agresione ndaj policëve, por edhe prodhim dhe mbajtje substancash narkotike. Në momentin e arrestimit të tij ka patur tifozë që e kanë përshëndetur, por edhe të tjerë që e kanë fyer.