Tifozët e Zenitit djegin flamurin kuqezi

Urrejtja “sllave” ndaj shqiptarëve, e demonstruar me veprime dëshpëruese, por tepër të ndalueshme “futbollistike”, të djegjes së flamurit kuqezi, simbolit kombëtar, i kaloi kufijtë e Serbisë, për të mbërritur të enjten e shkuar deri në Rusinë e largët. Në një ndeshje të “Europa League”, të zhvilluar mes Zenit Petersburg dhe Hajdukut të Splitit, e fituar nga rusët e drejtuar nga Luciano Spalleti me rezultatin 2-0. Agjensi të huaja lajmesh, ndër të cilat “Reuters” edhe me foto, kanë treguar me fakte se tifozët e Zenitit kanë djegur flamurin shqiptar dhe atë kosovar gjatë ndeshjes së kësaj skuadre me Hajduk të Splitit, në radhët e të cilit aktivizohet edhe një lojtar shqiptar, mesfushori i kombëtares kuqezi, Ervin Bulku. Kështu, pas tifozëve huliganë serbë, që e kryen këtë veprim më përpara, në ndeshjen eliminatore Itali-Serbi, që u ndërpre në minutën e 7-të në stadiumin e Xhenovës, radhën e patën tifozët ruse të Zenitit për ta djegur flamurin kombëtar të Shqipërisë. Nuk pati asnjë të arrestuar për këtë ngjarje, asnjë reagim nga askush.