Edona Llalloshi: Frymëzimi që më solli dashuria

Ajo nuk ka nevojë për t’u zhveshur për të qenë e pëlqyer dhe as të bëjë skandale, që të tërheqë vëmendjen e njerëzve. Edona Llalloshi, këngëtarja kosovare, ka tashmë adhuruesit e vet, të cilët i qëndrojnë besnikë në çdo kohë. Së fundmi, këngëtarja është fejuar. Në një intervistë për “Panoramën”, ajo tregon njohjen me të fejuarin dhe projektet muzikore.

Jeni ndër të paktat artiste që rrëfyet publikisht për fejesën tuaj, pa u lënë shkas mediave të përflasin për këtë ngjarje…
Pse te ngurroj, kur të dashurin e kam zgjedhur vetë dhe fejesën e kemi bërë pa bujë, paksa sipas traditave tona. As mua, as Gazmendit nuk na pëlqen zhurma e gëzimit tonë. Mediat nuk kanë manovruar asnjëherë në karrierën time dhe për këtë gazetarëve u jam mirënjohëse. Megjithatë, nuk përjashtohet ndonjë thashethem i cili mbaron sapo nis një lajm i ri.
Si jeni njohur me të fejuarin tuaj dhe ç’ju tërhoqi tek ai?
Një njohje spontane do të thosha. Gazi ishte shumë i sigurt në atë që ndjente për mua. Jemi shoqëruar gati një vit, jemi njohur edhe familjarisht, pastaj nuk e kam pasur të vështirë t’i them “PO” vendosmërisë së tij. Përveç vendosmërisë, vlerësoj te ai edhe sinqeritetin, guximin, dëshirën për t’i thënë gjërat hapur edhe atëherë kur diçka nuk mund të të pëlqejë. Jam shumë e bindur se ai, deri në fund u është besnik qëndrimeve të tij (e ato qëndrime më kanë pëlqyer prej ditës së parë të njohjes).
Jeni një këngëtare që karrierën tuaj nuk e keni ndërtuar me skandale. Edona nuk “zhvishet” si të tjerat, Edona nuk përdor ekstravagancën për të joshur publikun, pse?
Publiku e do këngën, e do zërin, emocionin, mesazhin që përcjell këngëtari. Gjërat e tjera po bëhen pjesë përcjellëse e një kënge. Nuk e shoh veten në ato performanca. Më duken të tepërta. Publikut shqiptar, para së gjithash ua përçoj ndjenjën dhe veprën që e kanë krijuar kompozitori dhe autori i tekstit, ndërkaq në videoklipe pjesë përbërëse janë edhe një numër personash. Dikush mund të luajë edhe me ekstravagancën, feminilitetin, ato nuk përjashtohen as në muzikën botërore. Mua më pëlqen estetika, por edhe thjeshtësia. Dua të besoj se jam brenda të dyjave.
Nëpër forume të ndryshme komentohet se kënga “Romanca” i dedikohet dashurisë së re, është e vërtetë?
Kjo këngë është pëlqyer nga publiku, ndaj në internet forumistët shqiptarë nuk kanë përtuar që të komentojnë. S’ka gjë. Mund të jetë koincidencë, por vërtetë emocioni dhe lidhja me Gazmendin janë pjesë edhe e kësaj kënge. Sigurisht që në të ardhmen, dashuria që po e përjetoj përditë e më bukur, do të jetë frymëzim për këngë të reja.
Gjatë verës hodhët në treg një album me këngë “live” dhe u angazhuat në mbrëmje muzikore. Pas fejesës keni menduar për ndonjë këngë të re?
Albumi përmban 9 këngë dhe së shpejti do të realizojmë një videoklip të ri në bashkëpunim me Milotin, vëllain tim, i cili ka një shtëpi diskografike dhe së shpejti do të filloj edhe me realizimin e videoklipeve.
Është shkruar se keni blerë një vilë, është investim juaji personal?
Vila “Edona” është pronë familjarë, ku jetojmë familja ime dhe tashmë jemi vendosur aty nga qendra e Prishtinës. Mua më pëlqen qetësia dhe aty e kam gjetur atë larg zhurmës së kryeqytetit dhe të udhëtimeve të shpeshta nëpër koncerte.
Tashmë bashkëjetoni me të fejuarin?
Gazmendi jeton në Pejë dhe jeta ime momentalisht është në mes të Pejës dhe Prishtinës.