Ne 100-vjetorin e Pavaresise, Turqia na ripushton...nga ekranet!

“Pushtuesit” e vitit 2012 mbajnë emrat “Gymysh” e Mehmet, “Xhanan”, “Ezel”, “Menekshe e Halil” e deri edhe Sulejman. E kush do ta kishte imagjinuar që kur po mbushim nje shekull liri prej Perandorisë Osmane, turqit të na ktheheshin sërish! Populli shqiptar gjendet para një pushtimi tjetër nga Turqia, pikërisht në vitin, kur festojmë jubileun e 100-vjetorit të Pavarësisë... Një kontradiktë, që duket edhe si një lloj ndëshkimi për të vazhduar ende të jetojmë me “hijen” otomane. Këtë herë nuk bëhet më fjalë për sundim të territoreve përmes uhtrive, por si armë mjaftojnë thjesht ekranet e stacioneve televizive me telefilmat e telenovelat që vijnë nga ish-Perandoria që na mbajti nën sundim. S’bëhet fjalë më për pashallarë, ndonëse dy prej tyre të kujtojnë Sulltan Mehmetin, apo Sulejman

Pashën.... “Pushtuesit” e vitit 2012 mbajnë emrat “Gymysh” e Mehmet, “Xhanan”, “Ezel”, “Menekshe e Halil” dhe Sulejman, i cili vjen në sajë të një telefilmi, që të sjell në mendje akoma periudhën e luftës. Janë të paktën pesë prodhime turke, që kanë nisur të bëjnë për vete shqiptarët, të cilët duken të dorëzuar përpara “valës” së dhunshme, me të cilën ka hyrë papritmas sërish Turqia me historitë e saj, nëpër shtëpitë e tyre.

Praktikisht në vendin tonë ka hyrë një modë e re turke. Disa madje kanë filluar t’u vendosin emrat fëmijëve, pikërisht si ata të personazheve të telenovelave. Kurse disa të tjerë kanë nisur të gjejnë edhe ngjashmëri me aktorët, apo të frymëzohen prej roleve të tyre për jetën reale, meqë ka shumë ngjashmëri me problematikat shqiptare. Jo të paktë janë edhe ata, të cilët kanë përfituar që pas italishtes, apo spanjishtes të mësuar nga ndjekja e ethshme e telenovelave, tani të fillojnë të përvetësojnë turqishten. Me siguri që gjithçka do ta kenë më të lehtë, duke parë se disa fjalë janë të ngjashme me gjuhën tonë. Janë pikërisht ato, që na kanë kanë lënë turqit si “kujtim”, gjatë pushtimit.

Dikur ishte moda e prodhimeve amerikano-latine, por pasi u velën me telenovela nga Meksika, Brazili e Venezuela, televizionet private shqiptare kanë menduar të hedhin vështrimin më afër. Me atë që ofron Italia, ndoshta s’kanë pasur shumë sukses, përderisa teleshikuesit kanë mundur t’i shikojnë serialët e atjeshëm më në avancë, direkt nëpër televizionet italiane. Kështu që duket se ka realizuar më e goditur dhe e suksesshme zgjedhja për t’iu drejtuar tregut filmik turk, që së fundi ka mundur të çajë e të bëjë kërdinë në të gjithë Ballkanin. Mirëpo ja që ky fenomen, në vendin tonë tingëllon si një pushtim tjetër, natyrisht më i butë se ai i përpara 100 viteve. Por kësaj radhe nuk ka Skënderbe që t’i ndalë...