Eni Koçi: Ja përse kam zgjedhur Noizy-n!

Eni Koçi, këngëtarja e re dhe e suksesshme vjen në këtë rrëfim duke na treguar sekretet e klipit të saj më të ri, i cili që pa dalë ka shtuar shumë kuriozitetin e fansave të saj. Një këngë, e cila vetëm pas pak kohësh do të transmetohet me klip, është një duet mes Enit dhe reperit Noizy.

Eni tregon se përse ka vendosur të ketë bashkëpunime me Noizy-n, dhe çfarë e bën kaq të veçantë bashkëpunimin e të dyve. Gjithashtu, vajza simpatike tregon edhe për jetën e saj të përditshme, ku dihet se të jesh e famshme nuk është dhe aq e lehtë. ”Unë kam vetëm një mike të ngushtë dhe ajo është kudo me mua, në studio e kudo. Ndaj si të thuash, shoqërinë e mbaj me vete, sepse kohë të lirë fatkeqësisht nuk kam”, – shprehet Eni për kohën e saj jashtë skenës apo studiove të incizimit.

Eni, keni nisur karrierën tuaj muzikore qysh në moshë të vogël. Na thuaj pak si ka qenë për ju deri tani kjo rrugë?

Ka qenë një rrugë e bukur, e vështirë, por ende është fillimi për mua.

Cila është kënaqësia juaj më e madhe kur dilni në skenë?

Emocionet që të dhuron dashamirësia e publikut në skenë janë të pazëvendësueshme. Përpiqem të jap gjithmonë maksimumin tim dhe asnjëherë nuk zhgënjehem.

Keni provuar përherë stile të reja këngësh. Ju ku ndiheni më mirë?

Më pëlqejnë shumë baladat R&B, sepse dhe mund të tregosh vlera vokale, por unë deri tani vetëm dy balada kam gjithsej në repertorin tim. Jam energjike, kështu që jam përshtatur goxha me këngët ritmike.

Së fundi keni bashkëpunuar sërish me Noizy-n. Na thuaj diçka mbi bashkëpunimet tuaja?

Në fakt nuk mbarojnë këtu bashkëpunimet tona. Noizy përveçse është një djalë shumë i mirë, e dimë të gjithë që është tepër i talentuar, ndaj dhe bashkëpunimet na ‘shkojnë vaj’ si i thonë. Do sjellim vazhdimisht diçka ndryshe për publikun.

Përse sërish Noizy? Nuk ka reper tjetër me të cilin mund të bëni duet?

Noizy-n tashmë e konsideroj një nga kolegët dhe miqtë më të mirë, ndaj vijojnë bashkëpunimet. Sigurisht që ka, por unë përshtatem mjaft mirë artistikisht me Noizy-n.

Çfarë e bën të veçantë dhe të suksesshëm njëkohësisht bashkëpunimin tuaj me Noizy-n?

Këngët e bukura dhe gjetjet, që besoj nuk na mungojnë në këngët tona.

Eni, pritet të dalë kënga juaj më e re. Na zbulo diçka më shumë rreth fabulës së saj…

Është në përfundim e sipër videoklipi “Je gjithçka”, që tashmë e dimë të gjithë që është një këngë dashurie, por dashuri nga ato të bukurat, jo me dhimbje. Gjithashtu kam përfunduar videoklipin e një tjetër kënge që e kam solo, tepër ritmike “Love me”…Në këtë video po që do të më shihni ndryshe…

“Je gjithçka”, kujt i dedikohet?

Tek kjo këngë mund të gjejë gjithsecili vetveten. Është realizuar për të gjithë të dashuruarit.

Si do të vijë Eni Koçi në këtë klip?

Përpiqem që në çdo daljen time të jem ndryshe, gjithashtu dhe në këtë video. Jam më aktore se kurrë (qesh). Për më shumë do flasë vetë klipi.

Eni, në klipet tuaja preferoni të eksperimentoni me look-un tuaj. Ju pëlqejnë ndryshimet?

Më pëlqejnë shumë. Dua që gjithmonë të sjell risi dhe ta shoh veten ndryshe.

Mbështetja juaj më e madhe në muzikë cila është?

Familja ime dhe publiku…

Çfarë ju qëllon të diskutoni më shpesh me Gretën? Kush jep më shumë këshilla nga ju të dyja sa i përket muzikës gjithmonë?

Ne diskutojmë çdo gjë bashkë. Greta është më e madhe dhe më profesioniste, ndaj ajo jep më shumë këshilla.

Eni, sa kohë të lë fama që të shijosh edhe përditshmërinë, të themi me miqtë e tu?

Nuk më lë kohë fare. Unë kam vetëm një mike të ngushtë, dhe ajo është kudo me mua në studio dhe kudo. Ndaj si të thuash shoqërinë e mbaj me vete, sepse kohë të lirë fatkeqësisht nuk kam.

A ndihesh shpesh më e rritur sesa je realisht?

Ndihem me më shumë përgjegjësi se moshatarët e mi, më e veçuar. Gjithsesi, kjo është rruga që mua më pëlqen, kështu që nuk ndihem aspak keq që kam zgjedhur të jem kjo që jam.

Me djemtë si silleni? A keni shumë fansa që ju bezdisin?

Nuk është se kam shumë kontakte me njerëz të rinj, si të thuash për mua. Sillem shumë normale. Absolutisht nuk më bezdisin, përkundrazi jam shumë e lumtur që më përkrahin.

Momenti më i bukur në muzikë për ju, cili ka qenë?

Nuk e di. S’mund të veçoj….ka shumë.

Ku do ta shohim Eni Koçin së shpejti veç klipit?

Tani për tani nuk kam ndonjë plan tjetër. Vetëm do sjellë klipe dhe këngë të reja.

A keni në projekt ndonjë album apo marrje pjesë në festivale?

Sigurisht albumi im “Love me” do të publikohet shumë shpejt së bashku me videon me të njëjtin emër “Love me”. Shumë surpriza do të ketë në këngët dhe klipet që unë do realizoj, vetëm duhet pak durim…

Jonida Hitoveizi MAPO