Hakmarrja eshte pothuajse gjithmone e kote!

Një inat i vjetër mund t’ju shtyjë që t’i bëni keq personit që ju ka lënduar në të kaluarën.Edhe pse është një reagim i kuptueshëm, mund të shndërrohet në fiksim, duke ju bërë të humbisni kontrollin.

Kur hakmarrja është “e shëndoshë”...

Është e kotë ta mohojmë, por të gjithëve na ka ndodhur që të hakmerremi ndaj një personi të caktuar, për një gabim të bërë, apo të imagjinojmë dënimin më të keq për atë që ka na lënduar ne ose të dashurit tanë. Megjithatë duhet theksuar se të gjitha këto janë vetëm fantazi, që lindin pas një zemërimi apo inati të fortë. Kjo është një lloj shfryrje, ose “veprim mendor” që shkakton agresivitet, por pa i bërë dëm njeriu dhe që në të njëjtën kohë mban të stabilizuar ekuilibrin psikik energjik. Për sa kohë mendimet e hakmarrjes janë sporadike dhe të përkohshme, mund të jetë e dobishme që të pranohen dhe të respektohen. Me këtë ne mund të zbulojmë anën tonë të fshehtë. Në fakt, për shumë persona është e mjaftueshme që thjesht të imagjinojnë hakmarrjen dhe në këtë mënyrë “çështja mund të quhet e mbyllur”. Megjithatë nuk përjashtohet fakti që e gjithë kjo gjendje e çuditshme të shndërrohet në diçka qesharake dhe ironike, gjë që largon tensionin dhe iu rikthen harmoninë.

Kur kalohet masa e hakmarrjes

Është një pikë përtej së cilës shumë fantazi bëhen të dëmshme edhe për vetë trurin, kështu që duhet bërë kujdes dhe të mos kalohet asnjëherë kufiri. Ju duhet të filloni të shqetësoheni kur keni këto shenja:

- Kur hakmarrjen e keni në mendje gjithë ditën, ose pothuajse pjesën më të madhe të ditës;
- Kur ju ndikon në marrjen e vendimeve dhe ju pengon në rrjedhjen natyrshëm të mendimeve;
- Kur ju tërheq shumë vëmendjen dhe ju merr energji mendore, nuk bëni gjë tjetër veçse imagjinoni me kujdes çdo lëvizje që mund të bëni;
- Kur në vend që agresiviteti të zbutet, shtohet më shumë mëria dhe dëshira e hakmarrjes së vërtetë, ndërkohë që mendja vazhdon të jetë e fiksuar pas së kaluarës;
- Kur dëmi i shkaktuar është në disproporcion me atë që ka ndodhur në të vërtetë.

Në të tilla raste, truri organizon aktivitetin e tij rreth këtyre bërthamave me mendime patologjike dhe fiksohet në atë nivel, duke rritur gradualisht ngarkesën e tij negative, e si pasojë duke arritur në pikën kritike, përtej së cilës inati kthehet në veprim ose kundër vetes (për shembull, duke nxitur dhembjet e kokës dhe sëmundjet autoimune), ose kundër të tjerëve me qëllimin e vetëm që në këtë rast është hakmarrja. Ja përse është e rëndësishme që të ndërhyni menjëherë sapo të ndjeni që gjërat nuk po shkojnë ashtu siç duhet.

Mos u ndjeni në faj

Të fantazoni më shumë se ç’duhet për t’u hakmarrë ndaj atyre që ju kanë bërë të vuani nuk do të thotë se jeni të këqij apo perversë, por që keni ndryshuar shumë nga personi i cili keni qenë dikur; keni grumbulluar mllef për të tjerët dhe nuk jeni përpjekur aspak për ta nxjerrë jashtë inatin. Është mirë që këtë ta dini.

Ndriçojini fantazitë tuaja

Për ta kuptuar dhe për ta larguar nga mendja hakmarrjen mund t’ju vijë në ndihmë psikoterapia. Ndonjëherë ata që janë të zemëruar, për shkak të ndonjë situate të mërzitshme, kanë nevojë të gjejnë dikë, ose diçka ku të shfryhen. Nëse gjërat shkojnë mirë sot, nuk do të thotë se kanë qenë të tilla edhe në të kaluarën.

Shkruani një letër

Shndërrojeni në veprim hakmarrjen që ndjeni (mos rrëmbeni shpatën në dorë, por bëni diçka domethënëse). Kështu mund të shkruani një letër që i drejtohet personit në fjalë dhe t’i shprehni në mënyrën më të mirë të mundshme të gjithë fantazinë tuaj hakmarrëse. Mos e quani çështjen të mbyllur deri sa të ndjeni që i keni thënë të gjitha. Pasi të mbaroni, mos e dërgoni letrën në adresën e tij, por mbajeni në sirtar dhe lexojeni sa herë të ndiheni të inatosur.

Zgjidhini menjëherë konfliktet

Te fëmijët, hakmarrja është e menjëhershme, po ashtu edhe sqarimi. Te të rriturit hakmarrja futet në përmasën e kohës, inati ruhet dhe gjërat mund të ndodhin pas shumë vitesh. Inatçinjtë ruajnë kohën e duhur në vendin e duhur. Këshilla e vetme është: bëni si fëmijët, gjeni kurajën që pasi të ziheni, pajtohuni menjëherë dhe të shijoni çdo moment që ju sjell jeta. /Shqip/