Adnan Januzaj bëhet me këngë!

Shqiptarët po mundohen në të gjitha mënyrat që ta bindin Adnan Januzajn ta zgjedh Kombëtaren shqiptare, pasi ka në opsion edhe Anglinë e Belgjikën,



Së fundmi madje është postuar në Youtube një këngë, ku i kërkohet yllit të ri të Manchester Unitedit të luajë për Kuqezinjtë.



Ndonëse fare i ri në moshë, Januzaj është cilësuar nga mediat britanike si Kristiano Ronaldo i mundshëm, me potencialin e një futbollisti profesionist dhe me një të ardhme pa diskutim të ndritur. Krahasimet me yllin portugez, Adnan Januzaj i shkaktoi pasi mahniti stafin e Mançester Junajtid me balancimin në fushë, gjuajtjet e fuqishme dhe vetëbesimin me të cilin mban topin në fazën përgatitore të sezonit. Ngjashmëria me Ronaldon nuk mbaron këtu, ata të dy ndajnë të njëjtën ditëlindje, 5 shkurtin, ashtu si edhe me “fëmijën e mrekullive” të Barcelonës, Neimar.

“Djaloshi ka dije pitagoriane për këndet dhe dimensionin, gjithashtu edhe një këmbë të majtë që përzien artin me saktësinë,” tha David Mojes, menaxheri i Mançester Junajtid që prej korrikut të këtij viti.

Ndërkohë në Shqipëri, tek tifozët, por jo vetëm, fitimi i zemrës së Januzajt është bërë një çështje e nderit kombëtar. Ideja për joshjen e 18-vjeçarit, me pasaportë belge, por me gjak shqiptar, mori jetë më 14 gusht në rrjetin social “Facebook”.

Tashmë prej mëse një jave, më shumë se 28000 njerëz janë kthyer në mbështetës të zjarrtë të faqes me titull “Adnan Januzaj THUAJ PO SHQIPËRISË” dhe po postojnë foto të tyret nga çdo cep i botës me diçiturën e thjeshtë, por të ndjerë “Adnan thuaji po Shqipërisë”.

Fëmijë, femra, tifozë, gjyqtarë, mjekë, aktorë dhe familjarë po i luten yllit të ri, secili në mënyrën e tij, të zgjedhë ofertën e bërë nga Federata Shqiptare e Futbollit. Postimet, edhe ato humoristike dhe më të çuditshme, mbërrijnë çdo minutë nga e gjithë diaspora. Ka foto nga Shqipëria, Kosova, Iraku, Guineja dhe Ekuadori. Për të mbështetur këtë fenomen virtual, mund të vizitoni faqen në “Facebook” dhe të bëni foton tuaj që mund të bëjë ndryshimin.

Ndërkohë në një foto me një adhurues, Januzaj ka formuar me duar një shqiponjë për të nënkuptuar se ai nuk e ka harruar origjinën dhe gjakun e tij shqiptar.

Biografia

Januzaj ka lindur më 5 shkurt të vitit 1995 në Bruksel nga prindër kosovarë. Në moshën 10 vjeçare, hyri në klubin e suksesshëm belg Anderleht, të cilin e la në mars të 2011-ës për skuadrën prestigjioze Mançester Junajtid. Ai la përshtypje të thella tek “djajtë e kuq” kur ishte vetëm 16 vjeç në një eveniment për shfaqjen e aftësive në futboll në Bruksel. Në mbyllje të sezonit 2012-2013, menaxheri i Junajtid, Sër Aleks Ferguson, i dha Januzajt numrin 44 të skuadrës britanike. Megjithatë, talenti nuk u aktivizua me skuadrën e parë në pjesën e mbetur të sezonit edhe pse ishte si zëvendësues në ndeshjen e fundit të Fergusonit, përpara se ky të dilte në pension.

Januzaj ka fituar çmimin “Denzil Haroun” si lojtari më i mirë rezervë për vitin 2013. Ai iu bashkua skuadrës së parë në fazën përgatitore të këtij sezoni dhe ishte një nga përformuesit më të mirë të Junajtid, duke shënuar edhe një gol.

Në ndeshjen ku Mançester humbi 3-1 me Seviljen, Januzaj fitoi çmimin “Lojtari Më i Mirë i Ndeshjes”. Kjo, sepse ai asistoi në shënimin e golit të vetëm të ndeshjes.

Në 11 gusht të 2013-tës, Januzaj bëri debutimin e tij për Mançester Junajtid në ndeshjen kundër Uigan, takim që përfundoi me rezultatin 2-0.

Në qershor të këtij viti, Mark Van Gersom, ish trajneri i U-18 dhe U-19 të Belgjikës, ka deklaruar se Januzaj disa herë e ka refuzuar thirrjen e Belgjikës, meqenëse preferon të luajë për Shqipërinë.

Trajneri i kombëtares shqiptare, Xhani De Biazi ka deklaruar me 12 gusht se Januzaj ishte një talent i madh. Ai shtoi se ai dhe Federata Shqiptare, po prisnin për momentin e duhur për t`i folur dhe për ta ftuar t`i bashkohej kombëtares shqiptare të futbollit.

Profili

Ditëlindja: 05.02.1995
Vendlindja: Bruksel
Mosha: 18 vjeç
Gjatësia: 180 cm
Kombësia: Belge, Kosovare
Pozicioni: Mesfushë, mesfushor i djathtë
Këmba që përdor: e majta
Klubi: Mançester Junajtid 2011-2013
Numri: 44

Ja si u krijua “Adnan Januzaj thuaj po Shqipërisë”

Janë tre tifozë dhe atdhetarë. Kaq i mjafton krijuesve të faqes së Facebook, “Adnan Januzaj thuaj po Shqipërisë”, të cilët mendojnë se më i rëndësishëm është misioni që i kanë vënë vetes. “Jemi thjesht tre tifozë, si të gjithë shqiptarët e tjerë. Na quaj Shkupi, Tirana dhe Prishtina”, është përgjigja e tyre nëse I pyet për emrat, kush janë dhe çfarë bëjnë në jetë.

-Si ju erdhi ideja për te krijuar këtë faqe? A e imagjinonit se do të kishte kaq sukses?

“Duke u nisur nga fakti se shqiptarët nuk kanë pasur ndonjëherë ndonjë lojtar në nivele kaq të larta ku luajnë, atëherë e kemi menduar të nisim këtë iniciative. Motoja është marrë nga një fushatë e mëparshme, “Ecolog thuaj PO”. Kemi dashur që të matim dëshirën e shqiptarëve se sa e duan një lojtar të tillë në Kombëtare. E prisnim se do rritemi në përmasa të tilla, por jo në një periudhë kaq të shkurtër.

-Mijëra mbështetës në pak ditë, e dini qe jeni bere faqja me e famshme shqiptare në “Facebook” në javën e fundit? Sa e vështirë është bërë të administrosh qindra foto që ju vijnë?

Është shumë e vështirë, pasi ka me mijëra e mijëra foto. Secili në mënyrën e vet e fton Adnanin që të vijë në Kombëtare. Shumë prej tyre ju kërkojmë falje publikisht, por nuk kemi mundur t’i postojmë, pasi i kemi cilësuar se ja humbin seriozitetin faqes. Secili prej nesh kemi edhe nga një pune tjetër, nuk e kemi hapur këtë faqe se e kemi “sëmundjen” e fanpage-ve apo like-ve. E kemi hapur sepse kemi një mision përpara dhe atë mision shpresojmë ta kryejmë me sukses.

-A mendoni realisht se Januzaj do të thotë “po” pas gjithë këtyre ftesave?

Duam të sqarojmë këtu diçka. Mos e kuptoni faqen si PRESION. Faqja ka për qëllim që Januzaj, në momentin që do të vendosë të luajë për një Kombëtare (e ajo kohë mund të jetë, sot, nesër, pas një viti, pas dy…) ta ketë parasysh edhe kërkesën e gjithë këtyre shqiptarëve, të cilët i kanë bërë ftesë. Do ngelet në ndërgjegjen e tij dhe është vendim ekskluziv i tij pohimi ose mohimi. Tani ju po thoni “A besoni?”. Nuk besojmë që është pyetje e drejtë kjo, pasi po të mos kishim besuar, nuk do ta hapnim faqen fare. Po të mos kishim besuar, nuk do te vinin rreth 30 mije njerëz dhe përfundimisht, po të mos besonim, nuk do na vinin foto nga pothuaj të gjitha kontinentet.

Kanë thënë për Adnan Januzajn

David Mojes, trajneri i Mançester Junajtid:
“Është gjithmonë mirë kur i jep një lojtari të ri një mundësi dhe ai përgjigjet pozitivisht. Do të përfitojë më shumë mundësi të tilla sa më shumë që të paraqitet në të njëjtën mënyrë”.

Aleks Ferguson, ish-trajner i Mançester Junajtid:
“Adnani është një lojtar I balancuar në mënyrë mjaft të mirë. Ai është vetëm 18 vjeç dhe ka ende kohë për t’u rritur. Por ai ka ekuilibër të mirë, përshpejtim po aq të mirë dhe është një futbollist shumë teknik”.

Xhani De Biazi, trajneri i kombëtares shqiptare të futbollit:
“Këtu fjala talent përdoret me tepricë, ndërsa Januzaj është një talent i vërtetë. Sipas meje, ai është një talent, që nëse nuk humbet për çështje psikologjike, do të dëgjojmë shumë të flitet për të. Duhet të jemi të kujdesshëm kur t’i afrohemi, duhet të kemi diçka për t’i ofruar pasi kur ti shkon, duhet t’i ofrosh diçka të rëndësishme. Ndaj duhet të presim pak”.

Lorik Cana, kapiteni i kombëtares shqiptare të futbollit:
“Ai është në rrugën e duhur për të qenë lojtari shqiptar me perspektivën më të madhe, po flas duke pasur parasysh cilësinë dhe moshën. Luan në një nga tre klubet më të mëdhenj në botë dhe të arrish në këtë moshë të re të inkuadrohesh me skuadrën e parë, është një arritje që nuk e ka realizuar asnjë shqiptar më parë. Mund të bëhet shqiptari që mund të arrijë gjërat më të mëdha deri tani në futboll. Është një shqiptar tjetër që pak para tij e ka hapur rrugën në këto skuadrat më të mëdha në botë për të fituar një trofe madhor, që është Shaqiri, por ai luan për Zvicrën. Ndërsa Adnani e ka mundësinë e zgjedhjes. Për sa i përket kombëtares, unë do ti këshilloja atij dhe me shumë dëshirë do t’i thosha që të bashkohet me Shqipërinë, sepse ai i përket vendit të tij. Për mendimin tim, Shqipëria do i sjellë një krenari, një kënaqësi dhe ndjesi që nuk ia sjell dot asnjë përfaqësuese tjetër. Nëse zgjedh Shqipërinë, e bën krenar edhe familjen e tij, na bën krenar edhe neve, ndaj e presim me shumë dëshirë”. /Vipat/