Nano preferon heshtjen

Edhe pse me një angazhim të ashpër para zgjedhjeve, ish-kryetari socialist ka preferuar heshtjen. Duket se rikandidimi i Ramës, paraqet provë për “neutralitetin” e Nanos, megjithëse, Ben Blushi pohon se “nëse Rama rihyn në garë, atëherë kjo i jep të drejtë Nanos të provojë sërish”.

Nga Express më 29.07.2009 në ora 15:32
Edi Rama është kryetar i Partisë Socialiste deri në zgjedhjen e një kryetari të ri… “Çdo njeri ka të drejtë të zgjedhë dhe të zgjidhet në përputhje me ligjet dhe të drejtën”. Ky ishte të martën qëndrimi medial i presidentit të Asamblesë Kombëtare të Partisë Socialiste, Gramoz Ruçi, menjëherë pas njoftimit që i bëri opinionit rreth dokumentit të miratuar nga forumi i lartë.

Përtej spekulimeve gati 1-mujore drejt datës 29 gusht kur edhe zhvillohet Kongresi i Jashtëzakonshëm, dalja e tij mund të hapë një spirale të re politike. Me mbështetjen publike që kreu i Asamblesë i ka dhënë rezolutës së Edi Ramës dhe “lehtësimin statutor e politik” që i ka bërë rikandidimit të këtij të fundit, gjasat janë që blloku kundërshtar të orientohet drejt zgjidhjeve më të forta.

Për të krijuar një ide të saj, mund të shërbejë një deklarim taktik i Ben Blushit, pak ditë më parë, në një emision televiziv. “Ramën me Nanon e bashkon humbja e një palë zgjedhjeve. Pra, një rikandidim i Ramës legjitimon hyrjen në garë edhe të Nanos”, ka deklaruar ish-sekretari politik.

Se sa do të bëhet realitet ky eventualitet politik, kjo mbetet për t’u parë, por ciklimi i tij nga një drejtues thuajse në garë i PS përbën një sinjalizim. Për më shumë që një angazhim i ish-kryetarit u bë publik para zgjedhjeve të 28 qershorit. Ajo që i jep edhe më shumë rëndësi rolit të Nanos është jo vetëm demonstrimi i forcës që ekipi i Ramës bëri në Asamble, por edhe shifra me të cilën ai u prezantua në publik.

Vetëm 15 vota kundër rezolutës së tij, në një kohë kur nënshkrues të dokumentit alternativ ishin 38. Shpjegimi matematikor i këtij “lapsusi” çon në përfundimin se procesi i votimit ka qenë jo dhe aq i saktë e për pasojë jo dhe shumë i pranueshëm në pikëpamje legjitime.

Gjithsesi, më shumë rëndësi ka aspekti politik. Edi Rama është e qartë se ka imponuar vullnetin e tij për të mos njohur zgjedhjet, duke krijuar rrugëdaljen statusore të rikandidimit. Përballë tij, në Kongresin që pasqyron raportet e Asamblesë, ende nuk ka një figurë balancuese dhe është në të drejtën e spekulimit, por edhe në përputhje me skenarin e Blushit që të pritet një riciklim i Fatos Nanos.

Diversioni i Berishës
Në situatën e zhvilluar së fundmi në opozitën socialiste ka dorë edhe kryeministri Sali Berisha. Me anë të teknikave të veta tashë të njohura, që nga 28 qershori e pas Berisha ka udhëhequr një aksion politik e medial, funksioni qendror i të cilit ka qenë thjesht diversioni ndaj PS dhe lojë me korrentet e ndryshme që janë konfiguruar brenda saj. Me sigurimin e një koalicioni me LSI, Berisha doli në skenë fillimisht me deklaratën dekurajuese se: “Rama nuk është në agjendën time”.

Një qëndrim, i cili haptas i frynte kontestimit të brendshëm në PS, apo të paktën synonte që të izolonte medialisht kreun socialist edhe nga jashtë. Ajo që e bëri edhe më evident ndërhyrjen e kryeministrit ishte deklarimi i tij i qëllimshëm një ditë para mbledhjes së Asamblesë Kombëtare: “Ftoj Ramën të bashkëpunojmë”, deklaronte kryeministri në një qëndrim që nuk gjen shpjegim tjetër veçse te synimi i tij për të pasur një ndikim edhe brenda opozitës socialiste që ka vetëm 4 mandate më pak sesa partia e tij. Ky kurs i tij korr kështu një sukses të radhës, pas fillimit të tij të parë publik në vitin 2002, në marrëveshjet formale dhe joformale, herë me një krah dhe herë me një tjetër.

Aktualizimi i diversioneve të djathta brenda të majtës është sot kështu një vektor që influencon zhvillimet e opozitës, duke cenuar autonominë e vendimmarrjes. Prova e parë është Parlamenti, dhe duhet thënë se kundrejt selisë rozë qëndrojnë sot shumë aktorë të interesuar për të manovruar me dobësitë e saj të brendshme.

Deklarata e Blushit
Ballafaqimi aktual në Partinë Socialiste nuk përfshin asnjë skenar të mundshëm për ndarjen e saj të mëtejshme. Hipotezat e mbetura sërish pezull, për shkak të Kongresit që do të mbahet më 29 gusht, kanë marrë të martën në mbrëmje një sqarim politik nga rivali kryesor, aktualisht i kryetarit të PS, Ben Blushi.

Gjatë një interviste televizive, ai ka deklaruar se “gogoli i ndarjes nuk do të qarkullojë më në korridoret e PS”, në një qëndrim ky që shfaqet si konstruktiv për kulturën e debatit në selinë rozë.

Duke hapur një dritare për atë që pritet të jetë edhe aksioni i kundërshtarëve të Ramës në parti, Blushi ka sqaruar se manovrat që zhvillohen aktualisht në bazën socialiste duke ushqyer frikën e ndarjes duhet të marrin fund. Duke ecur më tej me një analizë të përciptë të situatës, ai ka deklaruar se me humbjen e 28 qershorit, PS dëshmoi një rënie të ndjeshme të kapacitetit vendimmarrës, i cili u vërtetua më shumë tek institucioni i kryetarit. Një bjerrje e organeve të tjera është prekur edhe si element që dikton alternimin e medies si një dritare për të debatuar ato që nuk mundësohen në forume.

“Që nga 28 qershori, Kryesia është mbledhur vetëm 30 minuta”, theksoi Blushi, në një deklarim që evidentonte mbylljen e partisë si një pikë kritike. Kështu, në tërësinë e vet, nota kontestuese ndaj politikës së Ramës po përvijohet si një aksion integrues i të gjithë asaj kritike të heshtur apo të shpallur, që nuk ka arritur që në këto 4 vite të gjejë rrugën e shprehjes dhe të konkurrimit. (Libertas)