Bulqizë, burrë e grua gjenden të vdekur në banesë. Nisin hetimet

Dy të martuar, burrë e grua në moshë fare të re janë gjendur të vdekur në orët e para të ditës së sotme, por ende nuk bëhen të ditura shkaqet e kësaj ngjarje të rëndë. Blendi Bilali, 25-vjeç dhe gruaja e ti e re Jeta Bilali janë gjendur të vrarë në banesën e tyre, një ndërtesë e përbashkët e afro 20 familjeve në lagjen më të varfër të Bulqizës, e quajtur lagja "Gjeologu".
Kanë qenë disa krisma armësh që kanë alarmuar banorët e asaj ndërtese të cilët kanë lajmëruar menjëherë policinë, ndërsa janë gjetur të vdekur burrë e grua në banesë brenda.
Askush nuk është në dijeni të shkaqeve të kësaj vrasje të dyfishtë. Mësohet se të dy bashkëshortët kanë ardhur nga Shkodra prej 8 muajsh dhe jetonin në Bulqizë.
Banorët e zonës tregojnë se ata ishin një çift që shkonin shumë mirë. Mendohet se të dy personat të kenë ardhur për shkaqe gjakmarrje nga Shkodra për të banuar në këtë qytet të vështirë dhe me probleme të theksuara ekonomike e sociale.
Sipas burimeve jo zyrtare mendohet se më parë Jeta Bilali mund të ketë vrarë bashkëshortin dhe më pas veten e saj, pasi aty janë gjendur dhe armët me të cilët ata janë qëlluar.
Gjithnjë sipas kontakteve me banorët dëshmitarë të ngjarjes, çifti jetonte me punën në stokun e kromit, pasi Blendi Bilali, ua mblidhte kromin e nxjerrë banorëve prej aty dhe e shiste për të përballuar jetesës. Edhe banesa ku ata u gjetën të vrarë gjendet fare afër këtij stoku.