“Portokalli”, ja surprizat e edicionit të ri!!

Personazhe të vjetër rikthehen në kabare, gjashtë aktorë të rinj dhe më shumë femra

Drejtuesit kanë menduar që për të qenë të sigurt në një sukses tashmë të provuar, të rikthejnë personazhet e dikurshëm, që i kishin munguar sezonit të kaluar si Ponja apo Ramadani. Ajo që është përfolur si veçanti e këtij spektakli është se aktorët e njohur, luajnë personazhet e vjetër me të cilët janë identifikuar tashmë, por dhe karaktere të rinj.

Sallë amfiteatri, që të jep idenë e një qyteti antik, do të jetë skena që do të shohim të dielën, në spektaklin e parë “Portokalli” të humorit për këtë sezon, që transmetohet të dielën në ekranin e “Top Channel”. Ndërsa publiku do të jetë i ulur shumë pranë aktorëve, kjo e menduar për të krijuar intimitet, ashtu siç mund të shijohet teatri i vërtetë që nuk ka nevojë për distancë. Aktorët kanë vënë në dispozicion fantazinë dhe dellin krijues për të ardhur rishtas me pjesët e shkruara nga ata vetë. Pasi i kanë testuar pjesët me familjen, shoqërinë dhe kolegët, natyrisht që presin me emocion, derisa të marrin aprovimin e publikut, nëse kanë goditur në shenjë apo jo.

Rezultati që kërkohet?

Sa më shumë të qeshura. Drejtuesit e kësaj kabareje, teatrit të vetëm të humorit deri tani, janë treguar të rezervuar për surprizat e këtij spektakli, por ajo, që kemi mundur të zbulojmë është që do të jetë spektakli ku s’mund të bëhen parashikime, përsa i përket show-ut që krijon alternimi i skeçeve me hyrjen e personazheve të rinj, rikthimit të personazheve të vjetër, dhe imitimeve të personazheve vip, që dihet pëlqehen shumë. Janë gjashtë aktorë të rinj, që do të njohim këtë sezon, tre prej të cilave janë femra, dy që trajtojnë me humor problemet e shkollave dhe ato familjare.

Disa nga aktorët vijnë nga Prishtina, ndërsa do t’u lihet vend numrave të imitimit. Por jo vetëm personazhe të rinj, për të cilët jemi kuriozë të shohim, se sa do të mund të na bëjnë për të qeshur, por drejtuesit kanë menduar që për të qenë të sigurt në një sukses tashmë të provuar, të rikthejnë personazhet e dikurshëm, që i kishin munguar sezonit të kaluar si Ponja apo Ramadani. Ajo që është përfolur si veçanti e këtij spektakli është se aktorët e njohur, luajnë personazhet e vjetër me të cilët janë identifikuar tashmë, por dhe karaktere të rinj.

Organizatorët kanë punuar gjatë verës për një riorganizim dhe reformim të spektaklit, që nënkuptonte ndryshim cilësor dhe prurje të reja të aktorëve. Për këtë sezon, nuk u shpall audicion i hapur, por u provua një numër shumë i paktë aktorësh të rinj, kjo ndoshta dhe si një tentativë për të plotësuar boshllëkun që mund të krijojë mungesa e grupit “The SHBLSH”, pas përjashtimit nga spektakli të dy aktorëve, Julian Deda dhe Gent Zenelaj. Protagonistët e pëlqyer të këtij spektakli të përjavshëm, fituan audiencë, dhe u bënë aktorët më të dashur për publikun, ndërkohë që tashmë mund t’i shohim në një tjetër ekran, atë të TV “Klan”. Por rikthehemi sërish tek “Portokalli”. Shfaqja do të jetë “live”, të premten dhe të shtunën në sallën pranë Ish-ekspozitës, ndërsa të dielën do të transmetohet në mbrëmje në ekranin e “Top Channel”. Stafi është i njëjti; regjisor Altin Basha, drejtues Amarda Toska, Agron Llakaj, kostumografe Ilirjana Basha, etj.

Cilët do të jenë personazhet që do të sjellë vetë moderatori Agron Llakaj?

Le ta shohim, edhe pse thuhet që ai do të vazhdojë të interpetojë rolet e sezonit të kaluar. E ajo çfarë drejtuesit kanë menduar në tërësinë e spektaklit është që “Portokalli”, do jetë një mozaik karakteresh në harmoni me njëri-tjetrin. Më shumë le të shohim në show-n e parë!