LSI: Të fillojë puna për përmirësimin e Kodit Zgjedhor, jo ligje shtesë

Lëvizja Socialiste për Integrim shprehet se palët politike duhet t’i japin fund problematikës së zgjedhjeve, përmes angazhimin institucional për fillimin sa më parë nga puna për hartimin e reformës së re zgjedhore. LSI thekson se është i panevojshëm kërcënimi i PS-së për përmirësimin e ligjeve, në një kohë kur nuk merr pjesë në punimet e Kuvendit dhe për më tepër ulëret nga rruga. Nënkryetari i LSI-së, Edmond Haxhinasto, deklaron se debati politik i muajve të fundit për problematikën e zgjedhjeve të 2009-ës, duhet të marrë një drejtim të ri.

“Të fillojë sa më parë të reformës zgjedhore për zgjedhjet e ardhshme. Zgjedhje të lira e të ndershme, konkurrimi i ndershëm dhe i barabartë për të gjithë, proces i pakontestuar nga partitë pjesëmarrëse dhe gjithëpërfshirja e tyre, garantohet vetëm me një kuadër ligjor sipas standardeve ndërkombëtare, pra me një Kod Zgjedhor sipas këtyre standardeve. Ligjet nuk përmirësohen duke bërtitur nga rruga dhe as duke hedhur “shaçka” politike (fjala është për deklaratat e njeriut të Ramës, Olta Xhaçka - shënim i redaksisë)!”, u shpreh zyrtari i lartë i LSI-së, Haxhinasto. Sipas tij, angazhimi apo tërheqja para një përgjegjësie të tillë do të tregojnë më së miri nëse motivet e opozitës janë përsosja e standardeve të zgjedhjeve apo provokimi i krizës politike. “LSI ka filluar punën për përgatitjen e një platforme për përmirësimin e Kodit Zgjedhor duke riparuar defektet e vëna re gjatë zgjedhjeve të 2009-ës dhe duke zbatuar rekomandimet e OSBE/ODIHR-it në raportin e saj përfundimtar. Këto propozime do të paraqiten në mënyrë institucionale në Parlament”, deklaroi më tej, Haxhinasto.