Sot festohet 1 vjetori i anëtarësimit në NATO, bllokohen rrugët

TIRANË- Në Tiranë, nesër do të festohet një vjetori i anëtarësimit të Shqipërisë në NATO. Në sheshin kryesor do të organizohet një koncert festiv, organizuar nga Ministria e Mbrojtjes, për të cilin ende nuk janë dhënë detaje.


Ajo që dihet, është se do të ketë kufizim dhe bllokimit të qarkullimit në qendër. Pas njoftimit të marrë nga kjo ministri, Policia e Tiranës ka vendosur kufizimin e qarkullimit dhe marrjen e masave të sigurisë së rendit dhe qetësisë publike, për garantimin e zhvillimit normal të këtij aktiviteti festiv.


"Do të ketë bllokime të qarkullimit rrugor, nesër më datë 2 Prill 2010, duke filluar nga ora 15.00' deri më 24.00', përgjatë Bulevardit "Dëshmorët e Kombit" nga Ura e Lanës pranë Hotel "Dajtit" dhe deri në Sheshin "Nënë Tereza", Tiranë"- thuhet në njoftimin e policisë.


Po ashtu duke filluar nga ora 19.00' deri më 22.00', të ditës së sotme datë 01 Prill 2010 do të ketë kufizime të qarkullimit rrugor përgjatë segmentit të shtrirë përgjatë Sheshit "Nënë Tereza" Tiranë.


Policia kërkon mirëkuptimin e qytetarëve për bllokimin e Bulevardit "Dëshmorët e Kombit".
Kufizime do të ketë edhe në fundjavë me rastin e festimit të Pashkëve, që këtë vit përkojnë njëherësh për katolikët dhe ortodoksët.