BE: Zgjedhjet, e kaluat testin, tani drejt anëtarësimit në BE!

Presidenti i Bashkimit Evropian konfirmon vizitën e parë në Shqipëri në kuadër të turit Ballkanik

Presidenti i Bashkimit Europian, Van Rompuy i cilësoi dje zgjedhjet parlamentare të 28 qershorit, si zgjedhje me të cilat Shqipëria kaloi një test vendimtar për progresin e saj drejt anëtarësimit në Bashkimin Europian. Në ditën e dytë të vizitës së tij në Bruksel, Kryeministri Berisha zhvilloi një takim të veçantë me Presidentin e BE-së, Rompuy, e më pas të dy personalitetet dhanë edhe një konferencë për shtyp. Në fjalën e tij, kreu i Bashkimit Evropian vlerësoi progresin dhe hapat e Shqipërisë në kuadër të integrimit në BE, ndërsa vlerësoi maksimalisht standardet që Shqipëria arriti të realizojë me zgjedhjet e 28 qershorit. "Vitin e kaluar, Shqipëria zhvilloi zgjedhjet parlamentare. Këto zgjedhje ishin një test vendimtar i demokracisë në progresin e Shqipërisë drejt gatishmërisë për anëtarësim në BE", vlerësoi kreu i Bashkimit Evropian.Më tej ai i shprehu Kryeministrit Berisha garancinë se do të angazhohet fort për perspektivën e integrimit të të gjithë rajonit të Ballkanit Perëndimor.

Presidenti i BE-së tha se, Kryeministri Berisha përfaqëson një vend që e ka bërë në mënyrë shumë të qartë vizionin dhe ambicien e tij politike. "Do të doja ta përdorja këtë mundësi, gjithashtu të ripërsërisja angazhimin tim të fortë për perspektivën e integrimit të të gjithë rajonit të Ballkanit Perëndimor. Kryeministri më informoi për dorëzimin pranë Komisionit të përgjigjeve të Shqipërisë të Pyetësorit, pas aplikimit për t'u bashkuar me BE-në. Ky është një dokument historik për vendin tuaj", u shpreh Presidenti i BE-së, Van Rompuy. Duke u ndalur tek takimi me Kryeministrin Berisha, Presidenti Van Rompuy u shpreh se temë e bisedës ishin zhvillimet e brendshme politike të Shqipërisë. Presidenti Van Rompuy i konfirmoi Kryeministrit Berisha se Bashkimi Europian po i ndjek këto zhvillime me interes dhe vëmendje të madhe. Duke u ndalur tek liberalizimi i vizave, Presidenti Van Rompuy theksoi se, "diskutuam shkurtimisht liberalizimin e vizave dhe unë e kuptoj rëndësinë e lidhur me të dhe jam i bindur që Komisioni pa dyshim do të bëjë një vlerësim të plotë dhe objektiv dhe do të veprojë në përputhje me të".

Duke u ndalur tek stabiliteti i rajonit të Ballkanit, Presidenti Van Rompuy pranoi kontributin konstruktiv të Shqipërisë në stabilitetin e rajonit dhe në sfidat e sigurisë së rajonit. Presidenti Van Rompuy shprehu bindjen se Shqipëria do të ketë suksese të vazhdueshme, ndërsa ecën përgjatë rrugës së saj drejt Bashkimit Evropian. Presidenti Van Rompuy tha se për herë të parë në jetën e tij, tashmë 62 vjeç, do të bëj një tur në kryeqytetet e Ballkanit Perëndimor ku do të vizitoj edhe Shqipërinë. Presidenti Van Rompuy iu drejtua Kryeministrit Berisha se do të vlerësonte pritjen ndaj tij në Shqipëri. Ndërsa kreu i qeverisë shqiptare theksoi se do të ishte kënaqësi për mbarë kombin shqiptar të mirëpriste një personalitet si Presidenti Van Rompuy.

Qeveria do bëjë çdo reformë që Shqipëria të ecë drejt BE

Qeveria shqiptare do të bëjë më të mirën, duke ndërmarrë çdo reformë, ligj në mënyrë që Shqipëria të ecë drejt integrimit në BE. Gjatë konferencës së përbashkët për shtyp, Kryeministri Berisha dhe Presidenti Van Rompuy, shprehën kënaqësinë që u takuan në një moment historik për Shqipërinë, me dorëzimin e librit të përgjigjeve të Pyetësorit të Komisionit Europian, pas aplikimit për t'u bashkuar me BE-në. Shefi i qeverisë shqiptare i prezantoj Presidentit Van Rrompuy gjithë përpjekjet e Shqipërisë për t'u afruar më shumë me BE-në. Kreu i ekzekutivit theksoi se ndodhet në Bruksel për një moment shumë të rëndësishëm, siç është dorëzimi i librit të përgjigjeve të Pyetësorit të Shqipërisë nga Komisioni Europian. Shefi i qeverisë theksoi se ka informuar Presidentin e BE-së për të gjitha reformat, përpjekjet e Shqipërisë për të luftuar krimin e organizuar, korrupsionin, reformat ekonomike, duke përfshirë situatën politike në Shqipëri. Kryeministri Berisha e siguroi Presidentin e BE-së, se qeveria që drejton do të bëjë më të mirën, duke ndërmarrë çdo reformë, ligj, në mënyrë që Shqipëria të ecë drejt integrimit në BE. Kryeministri Berisha u shpreh se do të bëjë çdo përpjekje për të punuar së bashku me opozitën shqiptare për të thelluar më tej reformat e ndërmarra nga qeveria. Shefi i ekzekutivit shprehu gatishmërinë për të bërë të gjitha lëshimet në kuadrin e reformës zgjedhore. Kryeministri Berisha në fund të fjalës së tij dha një lajm të mirë për shqiptarët, ku deklaroi se Presidenti BE-së, Van Rompuy do të vizitojë Shqipërinë, vizitë e cila do të jetë shumë historike.