Balla dhe Malaj dalin nga greva, nisen në Bruksel: PE-ja të flasë për kutitë

Dy deputetët e Partisë Socialiste Arben Malaj dhe Taulant Balla ndërprenë mbrëmë vonë grevën e urisë për t'u nisur drejt Brukselit, pasi janë pjesë e delegacionit të grupit parlamentar socialist, që do të marrë pjesë në një mbledhje të Komitetit Ndërministror për Stabilizim Asociimin, BE-Shqipëri, ku do të diskutohet edhe për situatën më të fundit politike në vendin tonë.


Pas ndërprerjes së grevës së urisë në orën 11.00 të mbrëmjes së djeshme, deputeti i Partisë Socialiste Taulant Balla tha se Brukseli duhet të flasë qartë dhe direkt për zgjidhjen e situatës politike në Shqipëri.

"Edhe Brukseli sikurse tashmë edhe SHBA-ja do të duhet të flasë tashmë drejtpërdrejt me shprehje të sakta dhe të kuptueshme që në Shqipëri duhet të rivendoset demokracia duke nisur nga transparenca e 28 Qershorit. Kur kemi një krizë të thellë politike të shkaktuar nga personi që fshihet pas dritareve të Kryeministrisë, duhet që medoemos Brukseli të flasë me gjuhë të drejtpërdrejtë dhe unë jam i bindur që tashmë ka ardhur momenti që të vendoset dora në plagë dhe mbi shkaktarin e kësaj plage që ka sot Shqipëria që është Sali Berisha",- tha dje Balla.


Ai shtoi se edhe deklaratat e mëparshme të institucioneve të BE-së kanë folur për hetimin e zgjedhjeve. "Nëse lexohen drejt deklaratat e institucioneve përfaqësuese të Bashkimit Evorpian apo edhe të Këshillit të Evropës e kanë thënë qartë se në Shqipëri ka nevojë për një hetim të plotë të gjithccka ka ndodhur në zgjedhjet e 28 Qershorit. Nuk mund të ketë një hetim të plotë të zgjedhjeve nëse nuk hapen kutitë',- u shpreh ai.


Pikërisht në datat 3 dhe 4 Maj një delegacion i grupit parlamentar socialistë do të marrë pjesë në mbledhjen e Komitetit Ndërministror për Stabilizim Asociimin, BE-Shqipëri, ku pritet të diskutohet për situatën politike në vendin tonë. Pjesë e këtij delegacioni do të jenë deputetët Saimir Tahiri, Ditmir Bushati, Ermelinda Meksi, Valentina Leskaj, si dhe dy deputetët e tjerë që janë bërë pjesë e grevës së urisë Tauland Balla dhe Arben Malaj, të cilët do të ngujohen sërish pasi të kthehen nga kjo vizitë.