Berisha: BE ka hapur portat për Shqipërinë, falë lirisë së votës

Kryeministri Berisha ftoi dje nga Sheshi "Nënë Tereza" të gjithë qytetarët shqiptarë që bashkë me mazhorancën të vazhdojnë të sigurtë rrugëtimin drejt ndërtimit të Shqipërisë evropiane. Qindra mijëra qytetarë iu përgjigjën dje ftesës për të marrë pjesë në tubimin festiv për të mbështetur reformat e integrimit të vendit në strukturat euroatlantike. Duke përshëndetur përzemërsisht qytetarët, kryeministri theksoi se Shqipëria më shumë se kurrë ndonjëherë është afër ëndrrave të saj evropiane. Në këtë kuadër, ai theksoi se Bashkimi Evropian beson tek Shqipëria, tek reformat e saj, falë edhe përkushtimit të qytetarëve, falë votës së tyre të lirë. "Shqipëria këtë vit është Shqipëria anëtare e NATO-s. Është Shqipëria e vendimeve historike për çdo qytetar shqiptar, vendimeve për të çelur portat për këtë vend dhe për këtë komb drejt anëtarësimit të plotë në Bashkimin Evropian, vendimeve për të lëvizur të lirë, pa viza. Të gjitha këto i bënë të mundur djersa, mundi, përkushtimi juaj. I bëri të mundur vota juaj e lirë. I bëri të mundur fryma juaj qytetare, besimi juaj i pathyeshëm se Shqipëria do të bëhet një ditë zonjë, ashtu siç e duam të gjithë ne". Në fjalën e tij, Kryeministri Berisha falënderoi në mënyrë të veçantë kontributin e çdo qytetari për forcimin e hapave të Shqipërisë drejt Bashkimit Evropian. "Sot ne jemi në këtë shesh për të nderuar njëri-tjetrin, për të nderuar veprën e gjithsecilit, kontributin e çdonjërit prej jush në ndërtimin e Shqipërisë evropiane. Sot ne jemi këtu më të gëzuar se kurrë në historinë tonë. Sot ne festojmë si një vend që ecën i sigurt drejt idealit tonë evropian", u shpreh Berisha. Gjithashtu, ai shprehu nderimin më të thellë për çdo qytetar shqiptar, ndërsa i riftoi ata të ecin të siguritë drejt një të ardhmeje më të mirë për familjet e tyre, për fëmijët e tyre. "Iu shpreh nderimin tim më të madh ju dhe mbarë qytetarëve shqiptarë. Le të ftojmë ne së bashku çdo qytetar të këtij vendi të vazhdojmë udhëtimin tonë drejt Evropës, të zëmë vendin që ne meritojmë. Le të ecim ne të sigurt në të ardhmen evropiane për veten, fëmijët tanë dhe fëmijët e fëmijëve tanë, si e ardhmja më e shkëlqyer". Kryeministri shprehu bindjen se bashkimi i qytetarëve për këtë projekt madhor të qeverisë do të sjellë shndërrimin e kësaj pranvere në një pranverë të vendimeve të mëdha historike që presin vendin. Berisha shprehu gjithashtu përkushtimin e thellë për të punuar seriozisht drejt shndërrimit të këtyre projekteve jetike në realitet për çdo familje shqiptare. "Nga ky shesh edhe një herë ftoj çdo shqiptar: Le të bashkojmë përpjekjen tonë dhe ta shndërrojmë këtë pranverë në pranverën e vendimeve të mëdha për lëvizjen tuaj të lirë në mbarë Evropën! Le të vazhdojmë ne me mundin, djersën, punën, përkushtimin tonë të ndryshojmë çdo ditë e më shumë Shqipërinë! Le të vazhdojmë ne me mundin, djersën dhe punën tonë të begatojmë çdo ditë e më shumë këtë vend! Le të vazhdojmë ne me mundin, djersën dhe përkushtimin tonë të afrohemi gjithnjë e më shumë me vendet e zhvilluara dhe të synojmë t'i arrijmë ato!", vijoi Berisha.