Shqiptarët zgjedhin Europën dhe jo izolimin e Edvin Ramës

Dhjetramijëra qytetarë nga e gjithë Shqipëria festuan dje në Tiranë në një koncert madhështor reformat dhe transformimet më madhore që ka njohur ndonjëherë Shqipëria. Koncerti madhështor i organizuar nga Partia Demokratike rikonfirmoi një pjesëmarrje masive të qytetarëve duke i bashkuar ata drejt projektit ëndërr, atë të integrimit evropian. Shumë të rinj anembanë vendit nisën festimet që në orët e para të mëngjesit nëpër rrugët e kryeqytetit, me makina të mbuluara me flamuj shqiptarë, evropianë e të NATO-s. Pas 50 viteve ku shqiptarët qëndruan të izoluar nga diktatura komuniste, dje ata festuan më të lirë se kurrë në pritje të heqjes së vizave. Ndryshe nga protesta e opozitës, e cila solli mjaft probleme në qarkullimin e trafikut duke i ofruar një imazh të shëmtuar Tiranës si dhe nxiti provokime ndaj policisë, koncerti festiv i Partisë Demokratike nxiti në rrugët e kryeqytetit shqiptar mesazhin e shpresës dhe gëzimit. Në këtë mënyrë, Partia Demokratike ka përsëritur edhe një herë traditën e saj të mitingjeve të mëdha duke organizuar një nga koncertet festive me përmasa madhështore dhe entuziaste si asnjëherë tjetër. Atmosfera u bë edhe më shpërthyese kur në skenë u ngjit për të përshëndetur qytetarët vet kryetari i Partisë Demokratike, Sali Berisha. Koncerti i organizuar nga Ministria e Kulturës dhe Ministria e Punës për festimin e arritjeve të Shqipërisë ka nisur në Sheshin "Nënë Tereza" në orën 12, duke vijuar më pas me orë të tëra dhe duke mbajtur mbërthyer një pjesëmarrje të jashtëzakonshme të qytetarëve të Tiranës dhe gjithë Shqipërisë. Mijëra njerëz nisën festimet nëpër rrugët e Tiranës me makinat e mbuluara nga flamujt e Bashkimit Evropian dhe NATO-s. Mazhoranca dhe shqiptarët festuan dje për ëndrrat e tyre që po shndërrohen në realitet, për liberalizimin e vizave që pritet të ndodhë shumë shpejt dhe për rrugën e sigurtë të Shqipërisë drejt Bashkimit Evropian. Ftesa e Partisë Demokratike për të festuar reformat integruese dhe momentet historike që po përjeton vendi, ka marrë një përgjigje të fuqishme nga të gjithë qytetarët shqiptarë. Atmosfera e jashtëzakonshme festive përfshiu të gjithë Tiranën ku rrugët e kryeqytetit ishin pothuajse të pakalueshme duke nxjerrë në shesh të gjithë qytetarët për të festuar nën moton "T'i themi po Shqipërisë evropiane". Ky slogan dëshmoi edhe një herë tjetër se tashmë Shqipëria ka bërë hapa të fuqishme drejt Evropës dhe idealeve të demokracisë dhe lirisë. Si asnjëherë tjetër, dita djeshme e gjeti Shqipërinë si anëtare e suksesshme në Aleancën e Atlantikut dhe së shpejti edhe anëtare e Bashkimit Evropian. Shqiptarët gjithashtu u bashkuan në këtë koncert, për të festuar një hap tjetër madhështor që vendi ka hedhur në rrugën drejt anëtarësimit evropian. Shqiptarët festuan dorëzimin e Pyetësorit të Bashkimit Evropian në Bruksel nga Kryeministri Berisha, i cili i hapi rrugën Shqipërisë drejt anëtarësimit në BE. E gjithë Shqipëria zbriti në Tiranë për të festuar momentet jetike që po përjeton vendi në prag të vendimit për heqjen e vizave midis Shqipërisë dhe vendeve të hapësirës Shengen. Shqiptarët u bashkuan për reformat, vendet e reja të punës, rritjen e pagave dhe pensioneve si dhe rritjen ekonomike spektakolare të Shqipërisë në këtë kohë krize globale. Gjithashtu, ndërtimi i infrastrukturës rrugore më moderne në rajon dhe më tej si dhe projekti madhor i Shqipërisë dixhitale, kanë qenë lajtmotivet që kanë mbledhur qindra mijëra qytetarë shqiptarë në Sheshin "Nënë Tereza". Pikërisht realizimi i këtyre proceseve jetike madhore kanë bërë të mundur që dje të realizohet një nga festat më madhështore në nderim të punës, vullnetit dhe përkushtimit të qeverisë shqiptare.