Në treg dokumentari “Stones in Exile”

Mick Jagger, Keith Richards dhe Charlie Watts morën pjesë në New York në premierën e dokumentarit “Stones in Exile” (“Stonsat në arrati”), i cili u mbajt në Muzeun e Artit Modern.
Filmi përkon me rihedhjen në treg të albumit të “Rolling Stones” të vitit 1972 me titull “Exile on Main Street”, një përmbledhje kjo që përmban mjaft këngë të njohura të Stonsave si “Happy”, “Rip This Joint” apo “ Tumbling Dice”, për të cilën Jagger tha se është më e preferuara e tij në album.

Titulli i albumit në vitin 1972, ishte i tillë “Arratisje në rrugë të madhe”, sepse grupi u detyrua të largohej nga Britania pasi kishte probleme të mëdha me taksat e papaguara. Albumi është regjistruar në një shtëpi të marrë me qira në jug të Francës. Por duket se për prestarët e grupit nuk ka qenë aspak problem incizimi i albumit në Francë, madje ata e kujtojnë si një kohë mjaft argëtuese për ta.

Regjisori i filmit dokumentar “Stonesat në arrati”, është Stephan Kijack, i cili thotë se ka përdorur në këtë film, pjesë të patransmetuara më parë nga xhirimet e Stonsave në Francë. Ndonëse xhirimet janë amatore, dhe jo profesioniste, regjisori thotë se ato i japin origjinalitet gjithë dokumentarit.

Ky dokumentar është pjesëmarrës në Festivalin e Filmit në Kanë.