Së shpejti pritet të nisë dialogu për vizat me Kosovën”

Komisioneri i Bashkimit Evropian për Zgjerimin, Stefan Fule tha të martën se komisioni është i angazhuar që të nisë së shpejti dialogun për liberalizimin e vizave me Kosovën.Por, Fule tha se kusht për nisjen e këtij dialogu, do të jetë ecuria e zbatimit të planit të veprimit për integrimin e personave të kthyer. Fule tha se Komisioni po ndihmon Kosovën që të plotësojë kushtet për një marrëveshje të mundshme tregtare me BE-në."Komisioni do të propozojë hapjen e pjesëmarrjes së Kosovës në programe relevante të BE-së," tha ai.Komisioneri i BE-së tha se Kosova ka përpara sfida të mëdha politike. Në emër të Komisionit evropian, ai u bëri thirrje autoriteteve të Prishtinës që "të sigurojnë një qasje konstruktive ndaj pjesëmarrjes së Kosovës në forumet e bashkëpunimit rajonal". "Procesi i decentralizimit të Kosovës ka avancuar në mënyrë të ndjeshme dhe bashkëpunimi me EULEX-in është shtuar. Megjithatë, sfida të mëdha politike mbesin", tha Fule.