Numër i madh vëzhguesish për zgjedhjet e së dielës

Partia më e madhe e zgjedhjeve të kaluara në Kosovë, Partia Demokratike e Kosovës (PDK), do ta mbrojë votën që do të jepet për të, më shumë sesa të gjitha partitë e tjera. Partia e kryeministrit në largim Hashim Thaçi është munduar që këtë të paktën ta dëshmojë nëpërmjet numrit të madh të vëzhguesve që i ka akredituar për 12 dhjetor. Komisioni Qendror i Zgjedhjeve (KQZ) ka akredituar përfundimisht të gjithë vëzhguesit vendës të zgjedhjeve të 12 dhjetorit. Numri i përgjithshëm i tyre është 32.052. Rreth një mijë nga ta janë vëzhgues ndërkombëtarë, por mbikëqyrësit e huaj, kanë dërguar edhe disa aplikime ndërkohë, të cilat do të certifikohen nga KQZ-ja ditëve të ardhshme dhe do t’i shtohen numrit të përgjithshëm të vëzhguesve. PDK-ja do të ketë hiç më pak se 6.158 vëzhgues. E dyta për nga numri është Aleanca për Ardhmërinë e Kosovës (AAK), e cila ka 4.782. Lidhja Demokratike e Kosovës (LDK) do të ketë 4.690 vëzhgues, Koalicioni:AKR-PD-PSD-PPI-PPK-PNDSH-PGJK do të ketë 3. 406, lëvizja “VETËVENDOSJE”, për të cilën qe paralajmëruar se do të ketë numër të madh të vëzhguesve do të ketë vetëm 3.317. Lidhja Demokratike e Dardanisë (LDD) 1.041. Fryma e Re (FER) do të ketë 790 vëzhgues. Nga partitë e minoriteteve më së shumti vëzhgues do të ketë Samostalna Liberalna Stranka me 258. Akreditimet e tyre i kanë bërë edhe ambasadat e huaja dhe misionet e tjera ndërkombëtare, por disa prej aplikimeve shtesë që të huajt kanë bërë do të shqyrtohen ditët e ardhme në KQZ. Deri më tash, më së shumti nga ambasadat ka akredituar ajo amerikane: gjithsej 153 vëzhgues