Ogren Balluku i “Big Brother 4” , kunati i Sokol Balles

Është 26 vjeç dhe duket se në “Big Brother 4” po shfaqet me staturën e “lojtarit” të formuar intelektualisht dhe që i pëlqen të diskutojë për çështje të mëdha. Ogren Balluku, djali shtalartë i diplomuar për ekonomi, në skedën prezantuese për veten ka pohuar se merr pjesë në këtë “reality show” që transmetohet në “Top Channel” për të ndryshuar të përditshmen e tij dhe për një sfidë ndaj vetes.



Në fakt ambicia e tij është më shumë se kaq. Thuhet se ai ka hyrë në këtë garë karakteresh dhe personalitetesh për ta filluar kështu rrugën drejt televizionit, që mes miqsh mësohet të ketë pohuar se është një nga pasionet e tij të mëdha. Edhe pse në asnjë nga bisedat e tij brenda shtëpisë, ai nuk ka treguar më shumë detaje rreth hobeve dhe ambicieve të tij, kjo mund të konsiderohet si një nga strategjitë që ai ka zgjedhur për të pasur sukses në lojë. Edhe në prezantimin e familjes së tij, ai nuk ka përmendur shumë emra, ndërkohë që nga burimet tona mësohet se ai është kunati i gazetarit të njohur Sokol Balla, moderatori i emisionit kryesor politik, “Top Story”, në “Top Channel”.

Në klipin e përgatitur me hyrjen në shtëpinë e “Big Brother”, Ogreni u prezantua bashkë me njërën nga motrat dhe vajzën e saj, duke rrëfyer më tej se ishte vëllai i vogël i dy motrave më të mëdha, të dyja të martuara. Motra tjetër e tij është pikërisht Belinda Balluku, zëdhënëse në Bashkinë e Tiranës, që është bashkëshortja e gazetarit Balla. Thuhet se Balla, edhe pse është pjesë e televizionit “Top Channel” i ka qëndruar larg hyrjes së kunatit të tij në këtë lojë, duke mos dashur aspak të përzihet. Ndërkohë që as Ogreni, të paktën deri tani s’e ka parë të arsyeshme ta përmendë këtë fakt në bisedat e tij me banorët e tjerë të shtëpisë.

Ndërkohë që janë krijuar klanet e para mes banorëve të “BB4”, duket se ai është afruar më shumë me Marielin, dhe Nedën vajzën 20-vjeçare nga Kavaja e diplomuar për filozofi, me të cilën u fol se ndoshta mes tyre ka lindur diçka më shumë. Ndërsa në bisedat e fundit me banoren tjetër, Klodianën, (me të cilën ka radhën për provën e javës), ai është përqendruar për lojën e meshkujve dhe të femrave. Ogreni ka pohuar se “ky vit është ndryshe në BB dhe ndoshta banorët e rinj do të sjellin gjëra akoma dhe më të ndryshme”. Të dy nuk i kanë fshehur strategjitë e tyre për të vazhduar sa më gjatë në këtë lojë. Por kush është Ogreni jashtë shtëpisë së “Big Brother”?! Ashtu si brenda shtëpisë ai ka si veçanti të tij në stilin e veshjes dhe “look”-ut, ndëthurjen e klasikes me sportiven dhe një rreth flokësh që e mban gjithnjë në kokë. Ka lindur në Vlorë, jeton në Tiranë dhe njihet për eksperienca të vazhdueshme me femra të bukura.

Ogreni ka mbaruar studimet e larta në Fakultetin Ekononomik të Universitetit të Tiranës, Dega Marketing dhe Administrim Biznesi, profesion që nuk e ka ushtruar shumë deri tani. Prej tri vjetësh ai punon si operator fluturimesh në aeroportin “Nënë Tereza” në Tiranë. Hobi i tij është futbolli dhe të argëtohet me shoqërinë. Thotë për veten që është i komunikueshëm, i qetë dhe social. Ka karakter të fortë, di ku dhe kur t’u imponohet të tjerëve dhe është folës e dëgjues i mirë”. Panorama