Legjendë tani quhet Lek Plepi, jo Partizani

Të kuqtë e kryeqytetit po përjetojnë momentin më të errët në historinë e tyre 65-vjeçare

Eshtë e vështirë t’i gjesh rrënjët e dështimit të Partizanit, pasi apriori shikohet vetëm ajo çfarë ndodh mbi faqen e dheut. Vështirë të merret vesh se çfarë po ndodh nën tokë dhe kujt i intereson që Partizani të marrë statusin “na ishte njëherë”. Opinioni sportiv për vite me radhë është mësuar e dashuruar me termin “legjenda Partizani”.

Por realiteti ynë ka arritur deri aty sa antivlerat, injoranca, banaliteti dhe amatorizmi ngrihen në piedestal, ndërsa trashëgimisë i vihet flaka. Për momentin në Shqipëri legjendë nuk konsiderohet Partizani, por Lek Plepi. Fenomeni i shumëpërhapur në vend “Lek Plepi” pa dyshim ka lidhje edhe me Partizanin e tanishëm.

Nëse personazhi i mësipërm e pranon se është amator në fushën që vepron dhe famën po e vë nën lëkurën e tij, komplet ndryshe qëndron puna te Partizani. Te të kuqtë armata e amatorëve kërkon të bëhet e famëshme duke veshur fanellën legjendare. Por lind pyetja: kur nisi “lekplepizmi” te Partizani?

Një gjë është e sigurt: ky fenomen i ka zanafillat e tij që në momentin ku dera e ish-klubit në rrugën “Frosina Plaku” u hap për të gjithë të panjohurit dhe të paemërtit, që vërshuan së pari nga vendi dhe më pas nga jashtë.

Pa dyshim, ashtu siç ka njerëz që po përfitojnë nga amplifikimi i fenomenit të ri, natyrshëm që këtë kategori e gjen të mishëruar edhe te Partizani i tanishëm. Shqipëri e çuditshme kjo e sotmja, ku askush nuk e vë ujin në zjarr për shuarjen e Partizanit, emër i cili ka qenë pararoja e sportit shqiptar, baza e sportit elitar, ndërsa gjendet koha për të profetizuar fenomenin “Lek Plepi”.

Është thënë prej kohësh që grupi që përfaqëson aktualisht Partizanin nuk ka asnjë lidhje me emrin dhe vlerat e tij. Prandaj, nëse nuk duan ta lëndojnë dhe përbaltin më shumë Partizanin, grupi nuk duhet të mbajë në fanella numrat nga 1 deri në 11, pasi të dikurshmit ishin vërtet krenaria e futbollit (për respekt të asaj që kanë dhënë nuk ia vlen t’u përmendësh emrat).

Por edhe për këtë rast ka një shfajësim, i përdorin se nuk kanë të tjera, pasi ka pasur ndeshje ku në dispozicion ishin vetëm 13 uniforma. Partizani është ekipi që ka tifozerinë më të madhe dhe gjithëpërfshirëse në Shqipëri dhe pa dyshim numri i paktë i sportdashësve në stadiumet tona ka lidhje edhe me gjendjen kome të të kuqve.

Mungesën e Partizanit në elitë po e ndiejnë edhe kundërshtarët historikë, pasi për tifozët e Tiranës mungon adrenalina që prodhonte derbi më i madh i Shqipërisë. Madje në pamje të parë ecuria e Tiranës në dy edicionet e fundit mund të lidhet edhe me mungesën e Partizanit.

E habitshme ndërkohë është kur shikon që rrënimi i Partizanit nuk i bën përshtypje politikës shqiptare, ndonëse tifozë të të kuqve i gjen në të gjitha kahet. Federata pa dyshim ka peshën e saj të fajit në këtë rrënim, pasi asnjëherë nuk e mori në konsideratë funksionimin e këtij klubi, ndonëse dihet se presidenca nuk paguan për vite me radhë.

Pa dyshim inicuese e këtij rrënimi të Partizanit është edhe vetë federata, pasi në fillim të këtij sezoni pranoi që të kuqtë të luanin edhe në fushë e blertë dhe në dyert e gjykatës, kur dihet se ka procese të hapura për mënyrën e administrit.

Dyshues është edhe mënyra se si Ministria e Mbrojtjes ka vepruar me Partizanin për vite me radhë, kur dihet që shoqëria aksionare është kontestuar që në hapin e parë të krijimit, por është lejuar të funksionojë. Pas 10 vitesh, ministria kujtohet se logoja e Partizanit është pronë e saj legjitime dhe hap një tjetër kalvar gjyqësor.

Partizani po shuhet, ndërsa Lek Plepi po merr statusin e legjendës, por është mirë që armata e madhe e tifozëve të kuq ta marrë vesh mirë se cilat janë interesat e pashpallura që një monument kulture të përfundojë në listën e harresës.