Sakis Ruvas: Kënga shqiptare një nga më të mirat në Eurosong!

Ai është një pop star në Greqi por fama e tij i ka kaluar kufijtë e vendlindjes. 37 vjeçari i lindur në Korfuz,bëri që e gjithë Evropa të kërcejë nën ritmet e këngës së tij “Shake it” në Eurovizion 2004, viti ku ne morëm pjesë për herë të parë me Anjeza Shahinin. Kënga e Sakis fitoi vendin e tretë por fama e tij u rrit ndjeshëm. Për koinçidencë këngëtari simpatik do të përfaqësojë Greqinë këtë vit në Moskë, për herë të dytë, me këngën “This is our night”. Dhe po për herë të dytë mbas vitit 2004, edhe Edmond Zhulali e Agim Doçi i rithkehen Eurosong sikurse Sakis. Në këtë intervistë këngëtari i madh flet për këngën shqiptare të interpretuar nga Kejsi Tola dhe mundësinë që ajo të jetë një sukses në këtë eveniment të rëndësishëm.



Këtë vit Shqipëria përfaqësohet me një këngë ritmike,e kënduar nga një këngëtare 16 vjeçare Kejsi Tola.A e keni dëgjuar këngën e Shqipërisë dhe nëse po cili është mendimi juaj për këngën dhe këngëtaren?

Kam veçuar këngën e Shqipërisë dhe zërin e bukur të Kejsit.Uroj më të mirën për përfaqësuesen shqiptare,në një vit që karakterizohet nga shumë këngë të mira dhe me një rivalitet të lartë.Mendoj se Shqipëria këtë vit do të shkojë shumë mirë.

Jeni takuar me përfaqësuesen shqiptare gjatë kohës së Promotour?

Fatkeqësisht nuk më qëlloi që të takoheshim. Vizitova 11 vende dhe lutem të kisha kohë të shkonim dhe në vende të tjera dhe të njihja nga afër më tepër konkurrentë.

Keni vajtur ndonjëherë në Shqipëri dhe a keni planifikuar të jepni ndonjë koncert para publikut shqiptar?

Nuk më ka qëlluar të vizitoj vendin tuaj, megjithëse Shqipëria gjendet shumë afër me vendlindjen time të veçante, Korfuzin. Do më jepte gëzimin më të madh të vija në Shqipëri dhe të këndoja për publikun shqiptar.

Ju ka ndodhur që të bashkëpunoni me ndonjë artist shqiptar dhe nëse ju a kërkojnë do të dëshironit një bashkëpunim të tillë, meqë si vende fqinje na lidhin më tepër gjëra?

Kjo është e vërtetë, kemi ngjashmëri të mëdha. Nuk më ka qëlluar të bashkëpunoj me ndonjë artist shqiptar, por jam i hapur për bashkëpunim me këngëtarë shqiptarë, sepse besoj se ndodhin surpriza interesante, me bashkimin e zërave të ndryshëm.

Shpeshherë nëpërmjet këngëve,artistët përcjellin mesazhe miqësie, paqeje dhe dashurie tek popujt,sepse Ballkani ka kujtesa të dhimbshme të historisë së kaluar.Si artist edhe ju keni dhënë kontribut për këtë.Cili është mesazhi juaj për dy popujt fqinjë të përjetshëm?

Besoj se muzika gjithmonë bashkon vendet dhe njerëzit. Kënga vjen të tregojë gjëra pozitive, dashurinë, miqësinë, solidaritetin dhe të zbusë kujtimet negative të së kaluarës.Si artist gjithnjë përpiqem të kaloj mesazhe pozitive në çështje të tilla.

Në pjesëmarrjen tuaj të kaluar me fitimin e vendit të tretë, Shqipëria solli për herë të parë një vend të mirë,në dhjetëshen e parë,duke zënë vendin e shtatë.Mos jeni fatsjellës,sikur dhe
këtë vit Shqipëria të fitojë një vend të mirë?

Shpresoj sivjet që ky vit të jetë me fat për të dy vendet dhe të fitojnë vende të mira me këngët e tyre, sepse siç ju thashë më parë, konkurrenca është shumë e fortë.

Shqiptarët janë shumë fansa të Saki Ruva-s edhe në kenget tuaja, duke ju ndjekur vazhdimsht, por dhe në përgjithësi janë adhurues të muzikës greke. Si ndjeheni kur e dëgjoni këtë?

Pa përjashtim që ndjehem dhe jam shumë i gëzuar kur këngët e mia kalojnë kufinjtë dhe prekin publikun shqiptar. Me prek veçanërisht dashuria e shqiptarëve, aq më tepër kur ma demonstrojnë gjithnjë sa herë që i takoj. Pastaj muzika është një gjuhë e pavarur ku të gjithë munden të harmonizohen së bashku.

Vitet e fundit ndodh që vota shkon në vendet e Europës veri-lindore. Mos duhet të ndryshojë mënyra e votimit?

Sivjet për herë të parë, zbatohet një sistem i ri, që prodhon juri gjatë procedurës së votimit. Nuk mund të vlerësoj sistemin e ri, pa e parë sesi do funksionojë, por dua të besoj se do të jetë më e drejtë dhe më e vlerësueshme.

Siç e dini Shqipëria në Eurovizion 2004 në Turqi,ju dha vlerësimin maksimal,12 pikë,besoni se do të përsëritet edhe këtë vit?Dhe çfarë do të donit të thonit për publikun shqiptar që ju adhuron?

Shumë, shumë faleminderit publikut shqiptar që më çmoi maksimalisht duke më votuar në Eurovizion 2004. Shpresoj që dhe këtë radhë të dashurojnë këngën “This is our night”, të pjesëmarrjes tonë dhe ta votojnë atë. Mbështetja e Shqipërisë është shumë e rëndësishme për ne dhe sinqerisht e vlerësoj interesin dhe dashurinë tuaj.

Së fundi, me ato këngë që keni parë dhe dëgjuar deri tani, cilin vend besoni se do të fitoni në Eurovision?

Veçanërisht, këtë vit besoj se niveli i pjesëmarresve është shumë i lartë dhe konkurenca tepër e ashpër. Në shumë pjesmarrës kam veçuar të dhëna interesante,por meqenëse Eurovizion është një konkurs televiziv, do të kem një mendim të plotë kur të shikoj paraqitjen e tyre përfundimtare live në skenë. Atëherë do të vendos se cila këngë mund të arrijë në majë.