Kuvajti e njeh shtetin e Kosovës

Pas paralajmërimeve të kryetarit të Asamblesë Nacionale të Kuvajtit, Jasem Mohamad Al Kharafi, Kuvajti edhe zyrtarisht e ka njohur Republikën e Kosovës, duke u bërë vendi i 85 që njeh shtetin tonë.

Zyrtarë të Ministrisë së Punëve të Jashtme kanë konfirmuar se Qeveria e Kuvajtit ka njohur shtetin e Kosovës, ndërsa pritet që sot notën verbale t’ia dorëzojnë ministrit të Jashtëm, Enver Hoxhaj, i cili po zhvillon një vizitë zyrtare në Kuvajt.

Ndryshe, të shtunën kryetari i Asamblesë Nacionale të Kuvajtit, Jasem Mohamad Al Kharafi, gjatë vizitës që zhvilloi në Kosovë, pati paralajmëruar se vendi i tij shumë shpejt pritet ta njohë zyrtarisht pavarësinë e Kosovës.

Bregu i Fildisht është shteti i fundit që e ka njohur Republikën e Kosovës.

Fakte rreth Kuvajtit

Kuvajti është shtet i cili shtrihet në Azinë perëndimore, kufizohet me Arabinë Saudite në jug, në veri me Irakun ndërsa pjesa tjetër e territorit laget nga ujrat e Gjirit Persik. Ka një sipërfaqe tokësore prej 17,820 kilometra katrorë me një popullsi afro 3.6 miljonë banorë me kryeqytet Kuwait City. Kuvajti është Monarki Kushtetuese e udhëhequr nga Emiri ose Sheiku, gjithashtu ka edhe Këshillin e ministrave i cili e zgjedh Kryeministrin e Kuvajtit. Për shkak të rezervave të mëdha të naftës Kuvajti llogaritet ndër 5 shtetet më të pasura të botës.