Deri tani asnjë djalë s’e ka merituar t’i kushtoj një këngë!

Gjithmonë top,ajo befason publikun me gjëra ekstra. Këndimi, videoklipet, performancat nëpër koncerte e bëjnë të veçohet nga koleget e tjera.Njëra ndër të paktat këngëtare nga Maqedonia me të cilën mund të krenohen shqiptarët atje.Vokali i saj është vlerësuar nëpër shumë festivale.

Ajo premton album të ri dhe një duet si befasi për fansat.Nuk flet për jetën private pasi i është keqpërdorur disa herë.E bukur, e thjeshtë dhe me shumë klas,Tuna Sejdiu rrëfen gjëra interesante në prag të diplomimit dhe një stine të nxehtë koncertesh.



Tashmë këngëtare e afirmuar dhe shumë e pëlqyer nga publiku, ke shumë fansa gjithandej ku jetojnë shqiptarët, si i vlerëson këto vite në skenë?

Për mua vitet që kaluan pos që më dhanë suksesin falë këngëve, më dhanë edhe diçka shumë të vlefshme, shkollën jetësore.

Nga kush ke pasur përkrahjen më të madhe dhe nga kush përkrahesh tash?

Unë gjithmonë kam pasur përkrahjen e njerëzve të afërt,qoftë të familjes, shoqërisë bile edhe kolegëve gjë e cila është shumë e rëndësishme për mua.

Ke pasur vështirësi për të arritur deri këtu ku je tash?

Natyrisht që po, shumë herë kam thënë që jam perfeksioniste në punë dhe kjo më ka kushtuar shumë.

Kush e ka në dorë menaxhimin e punëve rreth karrierës tënde?

Vitet e fundit merrem vetë me menaxhimin e punëve të mia, kam njeriun i cili merret me marrëdhëniet me publikun dhe ai kryen pjesën më të madhe që më lehtëson shumë.

Ke këngë me tekste shumë interesante gjë që të bën më të veçantë nga këngëtaret e tjera të estradës, kujt i dedikohen këto tekste?

Asnjë këngë e imja nuk i është dedikuar dikujt konkretisht, ndoshta të frymëzuara po. Mendoj që nuk ka merituar deri sot dikush t’i dedikohet ndonjëra nga këngët e mia që përmbajnë një peshë të madhe artistike. Ndoshta jomodeste nga unë, por kështu mendoj, kjo nuk do të thotë që nuk do të vijë dita që do t’i kushtoj jo vetëm këngë po dhe një album njeriut të zemrës.

Edhe stili yt i veshjes nëpër paraqitje dhe evenimente të ndryshme duket diçka ekstra, me kë bashkpunon në këtë drejtim?

Bashkëpunoj me dizajnerë të ndryshëm në Maqedoni,Kosovë dhe Shqipëri. Kjo më jep hapësirë dhe të eksperimentoj me stilet e ndryshme të tyre. Kohëve të fundit kam bashkëpunuar me Valdrin Sahitin, një djalosh për të cilin jap gjithë respektin tim. Shumëherë i mbështetem edhe shijes time.

Po jeta në Selanik si është, çka bën Tuna gjatë kohës së lirë atje, preferon jetën e natës atje dhe a ka dallime mes Selanikut e Shkupit?

Me mbarimin e studimeve të mija edhe relacioni im Shkup-Selanik mori fund, gjë që më dha një lehtësim të madh në punë. Kjo nuk do të thotë që nuk i hip makinës edhe nuk shkoj për një shfrenim qoftë i jetës së
natës, qoftë ndonjë shopping. Selaniku gjithmonë më ka pëlqyer si destinacion për t`i mbushur bateritë.

Je duke mbaruar studimet, deri ku ke arritur?

Më lart ceka që përfundova studimet, më 3 korrik pres të ndodhë ceremoniali i diplomave në Selanik, një ditë shumë e veçantë për mua dhe familjen time.

Jeta juaj private kohëve të fundit ka qenë shumë e përfolur nëpër media, gjithashtu po publikohen foto të ndryshme, është në lidhje Tuna me dikë apo jo?

Eksperienca ime personale me mediat lidhur me jetën time private më ka bërë shumë të rezervuar në këtë temë. Kjo do të thotë që nuk do të flas më sepse çdo informatë e imja deri tani u ekzagjerua e u pompua edhe i’u servir publikut në forma të ndryshme.

Po pregaditesh për sezonin veror, ke planifikuar ndonjë koncert deri më tani?

Për mua ky sezon do të jetë i nxehtë, si dhe vetë projektet e mia.

Pas bashkëpunimit me Viganin dhe duetin “E boj nxehtë”,ke planifikuar diçka të re për këtë vit dhe çfarë presin fansat nga Tuna?

Pos albumit tim do të vijë edhe një bashkëpunim shumë interesant që do t’i befasojë të gjithë.


Në gjërat e Tunës

Çfarë telefoni mban?

Nokia E72 (dhuratë nga një person i dashur për mua)

Çfarë çante?

Varet nga kombinimi, e preferoj të zezën “Miss Sixty”, të cilën e kombinoj me shumëçka.

Ç'farë parfumi përdor?

“La Preire”, “Midnight Rain”, ishte i preferuari im gjatë sezonit dimëror, ndërsa tani iu ktheva "dashurisë së vjetër "Happy Clinic”.

Marka e syzeve?

Koleksioni më i ri i “Prada”, syze të bardha në formë fluture, shumë glamuroze njëkohësisht trendy.

Libri i preferuar në bibliotekë?

“Kodi i Da Vinçit”, Dan Brown.

Adresa e preferuar në msn?

Nuk dua ta bëj publike.

Aksesori i preferuar?

Pirsingu i artë në kërthizë “18 karat” gjithashtu dhuratë.