Reshje bore, përkeqësohet situata në Mirditë

Situata në rrethin e Mirditës ka ardhur duke u përkeqësuar dhe të
gjitha komunat janë bllokuar nga bora. Banorët apelojnë për ndihmë pasi
janë gjendur të papërgatitur nga moti i keq. Trashësia e borës arrin
deri në 2.5 m duke krijuar vështirësi për lëvizje në akset rrugore
nacionale.
Ndërkaq vazhdojnë të qëndrojnë të mbyllura shkollat në
zonat veriore të bllokuara nga bora. Ndërkohë që sipas Ministrisë së
Arsimit të Shqipërisë mësimi ka filluar në ato shkolla ku transporti nuk
është problem si në zonën e Korçës, Kolonjës dhe Pogradecit.
Moti
i ashpër ka bërë që shkollat në Dibër, Kukës, Malësi e Madhe, Has,
Tropojë, Pukë e Bulqizë të vazhdojnë të qëndrojnë të mbyllura. Ndërkohë
që në Librazhd mësimi nuk zhvillohet në pesë komuna, ndërsa në Mat në
tre te tilla.
Gjithsesi sipas Ministrisë së Arsimit, reshjet nuk
kanë shkaktuar dëmtime në infrastrukturën e tyre ndërkohë që në Tropojë,
drejtuesit e shkollave dhe anëtarët e shtabit të emergjencës po punojnë
për pastrimin e çative nga bora. Në zonat ku transporti nuk është
problem si në Korçë, Kolonjë, Pogradec dhe Devoll sipas Ministrisë së
Arsimit mësimi ka filluar.
Në Devoll mësimi nuk zhvillohet vetëm
në Arzë dhe Vidohovë. Ndërsa, në Pogradec nuk zhvillohet mësim në
komunat Trebinj dhe Proptisht.
Sipas deklarimeve të drejtuesve në
këto rrethe, situata po rëndohet për shkak të reshjeve të dendura të
ditës së sotme. Nga drejtoritë arsimore rajonale konfirmohet se hapja
dhe vijimi i procesit mësimor do të jetë në varësi të vendimit të
Komitetit të Emergjencës.